Nunanut allanukarluni ilinniaqqinnissaq soqutigineqarluartoq

Aningaasaateqarfik Danmark-Amerika aamma Fullbright Kommission, ilisimatusarfiit nunani tamaneersut peqatigalugit nunanut allanut ilinniariaqqinnissanut tunngasunik ilinniartunut saqqummiipput, siunnersuillutillu ilitsersuillutik.
Allattoq Sara K. Jakobsen
septembarip 11-at 2014 08:28
Ilinniartut nunanut allanut angalallutik ilinniaqqittarnissaat Ilisimatusarfiup ulluni makkunani immikkut sammivaa, ippassarlu Nunat tamalaat Ulluannik taallugu ingerlatsisoqarluni. 
 
- Ukiut tallimat ingerlaneranni maani peqataasarninni, aatsaat tamakkuninnga pisoqallattaasalerpoq, Inuiaat piorsarsimassusaasalu oqaluttuarisaanerannik Immikkoortortaqarfimmi kandidatinngorniartoq, Nuka Nathanielsen, KNR-imut taama oqarpoq.
 
 
- Iluartorujussuuvoq, paasissutissat toqqoqqavallaaratik saqqummiunneqarmata.
 
Taassuma USA-mut ilinniaqqinnissani pilersaarutigaa, immikkut suliarisassani piareersaatigalugu.
 
Saqqummiineq siulleq aallartiinnartoq ilinniartut 50-t angullugit amerlatigisut aggiareersimapput. Ullup sinnera ilinniartut nunanit allaneersut kalaallillu nunani allani ilinniarnikkut misilittagaqareersimasut angalarusuttunut siunnersuipput.
 
Angalalalluni ilinniaqqinneq iluaqutaasoq
- Ilinniarnernut atatillugu nunanut allanut angalasaqattaartarpunga. Angalanerit ilaanni ilisimatusarfiup ikiortarpaanga, arlaleriarlungali nammineertariaqartarsimallunga. Siunnersuilluni ilitsersuineq maanna ingerlanneqaqattaartoq torrageqaara, ilinniartummi arlaqarmata aqqutissiuunneqarnissamut pisariaqartitsisut, nunanut allanut angalaneq oqitsuinnaanngimmat, Inuiaqatigiilerinermut kandidatinngorniaq, Naja Carina Steenholdt taama oqarpoq. 
 
 
Taassuma ilinniartut nunanut allanut angalaqqullugit kajumissaarpai, ilinniarnerup tungaatigut pitsaaquterpassuaqartoq ilisimagamiuk.