Nunani allanit attaveqarnerup akikillinissaanik TELE-POST isumaqatigiissuteqarpoq

Skandinaviami Savalimmiunilu nalunaarasuartaatitigut attaveqaatinik suliallit tamaasa maanna akikillisaaviginninnermik isumaqatigiissusiorfigisimalerpai. Tamatumuttaaq TELE-POST-ip Islandimi Nova aamma Vodafone attaveqaataannik atuinissamut - roamingimik - isumaqatigiissusiorfigai, suliffeqarfiillu Islandimiut, Estlandimiut, Letlandimiut Kroatiamiullu suleqatigisatik amerlisillugit.

Isumaqatigiissutit nutaat kinguneraat MB datamik ataatsimik aallernermi akip 100 koruunit missaanniit 3,35 koruuninut apparnera. Nunanillu avannarlerniit nunatsinnut sianerneq 10 koruunit missaanniit 1,79 koruuninut apparmat. SMS-imillu ataatsimik nassiussineq 2,50 koruunit missaanniit 60 ørenut apparmat.

-Nalunaarasuartaatitigut attaveqaatinik suliallit suleqatigisagut amerlanerat nuannaarutigaarput. Sullitatta nunani pineqartuni angalatillutik maanna eqqissilluinnarlutik e-mailisiatik misissorsinnaalerpaat. Isumaqatigiissutit taamaattoq Tusass-imut atuutinngillat, tamanna Danmarkimiinnaq USA-ginnarmilu taamaallaat atorsinnaagallarmat.