NunaMinerals aatsitassarsiornissaminik suleqateqalerpoq

NunaMinerals tusagassiuutini sammineqaraangami amigartoornerit aningaasaliisinnaasussanillu pissarsiorsinnaannginnera piffissami kingullermi allaaserineqallattaapput, suliffeqarfiulli Namminersorlutik Oqartussanit piginneqataaffigineqartup GREP-mik isumaqatigiissusiorsimanini maanna nuannaarutigalugu nalunaarutigaa.

Huginimi misissueqqissaartoqassaaq
NunaMineralsip Paatusumi suliniutaanut atatillugu suleqatigiittoqarnissaa siunertaavoq, saffiugassat qaqutigoortut soorlu niob, tantal, zirkonium, uran thoriumilu piiarneqarsinnaalernissaat pillugu misissueqqissaarnerit pilersaarusiorneqarnissaat suleqatigiissutigineqassallutik.
Tunup kujasinnerusortaani nunaminertami misissuiffissatut naatsorsuussami Huginimik taaguuserneqarsimasumi misissuisoqassaaq.

Misissueqqissaartartut Greenland Rare Earth Projects Londonimi allaffeqarfeqarpoq, saffiugassanllu qaqutigoortunik Nunatsinni piiaasoqalersinnaanissaa pillugu misissueqqissaarnerit ilaatigut aaqqissuisuuffigisarlugit.

Tunup kujasinnerusortaa puigorneqakkajuppoq
Kalaallit Nunaata kimmut kujasinnerusortaani Gardari saffiugassanik qaqutigoortunik nunarsuarmi nassaassaqarfiunerpaasoq, NunaMineralsip pisortaata Ole Christiansenip oqaatigaa, Gardarimili nassaassat Tunup kujasinnerusortaani aamma nassaassaanerat ilaatigut puigorneqartartoq oqaatigaa:

- NunaMinerals GREP-lu nunaminertaq pineqartoq sukumiinerusumik misissuiffigisinnaalissavaat. NunaMineralsip saffiugassanik qaqutigoortunik Kalaallit Nunaanni misissueqqissaarnermini ilisimalersimasai, GREP-llu aningaasaliisinnaassusia, Londonimilu attaveqaatai iluaqutaalluarsinnaapput.

- GREP-p suleqatigilluarneqarnissaa qilanaaraarput, pilersaarusiallu ineriartortinneqarnissaat qilaanaralutigit. Nunatta kujasinnerusortaani uuttortagassat septembarip ingerlanerani uuttortassavavut, misissuinerillu immikkoortukkuutaanut avillugit 2015-imi naammassineqarnissaat pilersaarutigaarput, NunaMineralsip pisortaa Ole Christiansen oqarpoq.