Nukissiorfiit pitsanngorsarneqassaaq

Nukissiorfiit allaffissornikkut suliassat allanngortiteriffiginiarlugit toqqarsimavaat. Najukkami kiffartuussivinnut ullumikkut 15-iusunut taarsiullugu, allaffissornikkut suliassat nunap immikkoortuini tallimani isumagineqalissapput.

Nunap immikkoortui tallimaasut tassaapput Kujalleq, Sermersooq, Qeqqa, Disko aamma Avannaa. Nunap immikkoortui tamarmik immikkut pisortaqartinneqassappur.

Tamannali qanoq sipaarfigineqarsinnaava sullitallu aamma sipaaruteqassappat?

Nukissiorfiit pisortaanerat Henrik Estrup oqaloqatigaarput.

- Ingerlatat pitsanngorsartuarnerinut akikillisarnerinullu soorunami ilaaginnarpoq. Sulisunut naammassisaqarsinnaasutsimullu aningaasartuutivut ukiuni kingullerni marlunni annertuumik appartissimavagut, taamatullu periaaseqarneq ingerlateqqikkusupparput, Henrik Estrup oqarpoq.

Sullitalli ingerlaaannaq akinik appasinnerusunik neqeroorfigineqarnissartik naatsorsuutigisinnaanngilaat - aallaqqaammuunngitsoq.

- Aningaasartuutikillisaaneruvoq, imaanngitsoq tamatuma malitsigisaanik akinik appaasoqassasoq. Pitsanngorsaanerpulli akikillisaanerpullu akinut sullitatta akilertagaannut sunniteqassapput, pisortaaneq oqarpoq.

Allanngortitassat pisariaqartut piffissaq sivisooq ingerlanneqartussaanerat erseqqissarpaa, aningaasanilli sipaaruteqartoqarinnaanera naqissuserlugu.

- Periusissaq tamakkiisumik atuutileriarpat millioninik marlunnik kisitsisitalinnik sipaaruteqarsinnaanissarput naatsorsuutigaarput, oqarpoq nangillunilu:

Nukissiorfinnik nutarsaaneq sulisunik aamma annikillisaanermik malitseqassaaq.

- Aaqqiissutissanik soorunami nassaarniarsarivugut, allanngortiterinerullu annersaa sulisut suliunnaarnerat ilutigalugu, tassalu soraarninngortoqarneratigut allatigullu, ingerlanneqassalluni. Aammali sulisut ilaasa suliunnaarsittariaqarneranik kinguneqartussaassaaq, Henrik Estrup oqarpoq.

Nukissiorfiit qitiusumik oqarasuaatikkut kiffartuussiveqalissaaq, sullitallu oqarasuaatikkut sianerlutik saaffiginnissinnaassapput, suliassallu amerlanerusut nammineerluni aamma internettikkut isumagineqarsinnaalissallutik.