Nukissiorfiit nittartagartik nutarterpaat
Atuisartut, inuussutissarsiummik ingerlataqartut, politikerit aamma ilinniartitsisut akuttunngitsumik Nukissiorfinnut saaffiginnittarput paasissutissanik annertunerusunik pissarsiorlutik. Maannakkut nittartagaliorpugut kikkut tamarmik ilisimasassaminnik namminneq atugassaminnik pissarsiffigisinnaasaannik.
- Pisariaqartitsivugut periarfissamik tassani uagut ilisimasavut katersorsinnaallutigit aamma tamatumunnga ilutigitillugu assigiinngitsunut taakkununnga sammititsilluta. Tamanna pissarsiaraarput nittartagaq nutaaq aqqutigalugu, sullittakkat tassuuna nammineq paasissutissat ilaatigut akiligassanut aamma akigititanut tunngasut pissarsiarisinnaavaat, s.a. entreprenørit namminersortut suliffiutillit sanaartugassaatigut imaluunniit suliariumannittussarsiuussinivut pissarsiarisinnaavaat, tamakkumi taakkununnga naleqqunnerupput, Nukissiorfinni attaveqarnermut pilersaarusiortoq Anja Rosa Qvist oqarpoq.
Innuttaasut amerliartuinnartut smartphonenik atuilernerisigut Nukissiorfiit innuttaasunut tamakkuninnga atuisuusunut kiffartuussineq annertusarniarpaat. Smartphone atorlugu Nukissiorfinni atuinertik malittarisinnaanngussavaat. Nittartaq nutaaq taamalilluni atuinerminnik malinnaaginnarnissaminnut periarfissiivoq.
-Uagut kissaatigaarput sullittakkat periarfissat uaniittut "Atuinerit malinnaavigiuk" isiginiarnerulissagaat, tassuuna nittartagaq aqqutigalugu nukissiuummik atuineq ullut tamaasa malinnaaffigineqarsinnaavoq. Tassami nammineq atuinermik ilisimasaqarneq nukissiuutinik atuinermi eqqarsaateqartarneq pilersittarpaa, tamatumalu takutinneqarnissaa Nukissiorfinnit tamanut inassutigineqarpoq inuiaqatigiinni aningaaqarniarnermik aamma avatangiisinik mianerinninneq pissutigalugu, ” Nukissiorfinni attaveqarnermut pilersaarusiortoq Anja Rosa Qvist oqarpoq.