Niviarsiaqqap 15-inik ukiullip toqutaanera aalassassimaarutigineqaqaaq

Indianeri niviarsiaraq 15-inik ukiulik Tina Fontaine, indianernut nunagitinneqartut ilaanni Sagkeengimi sapaatip-akunnerata naanerani ilisaavoq. Niviarsiaqqap toqutaanera Canadami aalassassimaarutigineqaqaaq.
Allattoq Mads Lynge
aggustip 26-at 2014 07:40

Canadami naggueqatigiit Inuit indianerillu akornanni arnat qassit toqunneqareerpata aatsaat iliuuseqartoqarniarpa? Qassit aallarunneqarsimassappat?

Indianeri niviarsiaraq 15-inik ukiulik Tina Fontaine, indianernut nunagitinneqartut ilaanni Sagkeengimi sapaatip-akunnerata naanerani ilisaavoq. Niviarsiaqqap toqutaanera Canadami aalassassimaarutigineqaqaaq.

Aliasuttoqaqaaq, kamassimasoqaqalunilu. Canadami nunap immikkoortuini allani aamma aalassassimaartoqarpoq.

Iliuuseqartoqannginnera mamiasuutigineqarpoq

Canadami oqartussat iliuuseqannginnerat, Ontariop ministeriunerata Kathleen Wynnep mamiasuutigaa. Tina Fontainellu toqutaanerata immikkut ittumik misissuiffineqartariaqannginnera, Canadap ministeriunerata Stephen Harperip nalunaarutigereeraalu, pissutsit pitsaanerulinngillat:

- Toqutsinerit taakku suminngaanneersuunermit aallaaveqanngillat, nalinginnaasumilli pinerliiniarnerullutik, Harper ilaatigut oqarpoq.

Kisitsisilli takutippaat naggueqatigiit Inuit, indianerit métisillu arnartaat Canadami arnanit allanut naleqqiullugu amerlanerit toqutaasartut, ilaatigullu peqqarniitsumik.

Soorlu Tina Fontaine. Taanna toqoriarlugu qilersorneqarsimasoq puussiarsuarmullu ikeriarlugu kuummut Red Riverimut iginneqarsimasoq nassaarineqarpoq. Qitsuaqqat toqunneqarsimallutik puussiamut ikineqarsimasuuppata inuit mamiatsaatigisimassagaluaraat, Winnipegimi politiit qullersaata O'Donovanip oqaatigaa, arnarli matumani pineqarmat mamianarnerullunilu kamaatigineqartariaqartoq.

Arnat Peqatigiiffiisa, nunallu inoqqaavisa suliniaqatigiiffiisa, soorlu aamma nunap immikkoortuini siuttut piaartumik iliuuseqartoqartariaqartoq, Harperimut naalakkersuisunullu kaammattuutigaat.