NFBO: Meeqqat tusaaniarneqarsinnaanerat periarfissinneqartarpa?

Peqatigiiffik Nordisk Forening mod Børnemishandling og Omsorgssvigt - NFBO - arfineq pingajussaannik ataatsimeersuartitsilluni Nuummi ippassaq aallartippoq tamannalu sisamanngornerup tungaanut pissalluni.
Allattoq Elisa Isaksen
aggustip 27-at 2014 09:01

NFBO 1998-imi aallarnerneqarpoq tamatumanilu Naalagaaffiit Peqatigiit meeqqat pisinnaatitaaffii pillugit aalajangersagaat tunngavigineqarluni. Ataatsimeersuarnermi pingaarnertut sammineqartussat ilagaat "nunap ilaani inuttunngitsuni meeqqat atugaat", tamatumani meeqqat atugaasa pitsanngorsarniarneranni sulinermi meeqqat qanoq isumaqarnerat qanoq ilaatinneqarsinnaanerat pineqarluni.

Meeqqat tusaaniarneqarsinnaanerat periarfissinneqartarpa? Meeqqat oqaatigisaat tusaaniarneqartarpat? Meeqqanik sullissisut meeqqat soqutigisaat aallaavigisarpaat, imaluunniit meeqqat ikioqqunerat tusaaneqanngitsoortarpa?

Misilittakkanik paarlaasseqatigiittoqarsinnaassaaq

Meeqqat timikkut tarnikkullu atornerlunneqartartut, kinguaassiuutitigut naapertuilluanngitsuliorfigineqartartut allatigulluunniit sumiginnarneqartartut pillugit, Nunat Avannarliit suleqatigiinnerulernissaat meeqqanillu sullissisut misilittakkaminnik paarlaasseqatigiinnissaat ataatsimeersuarnermi siunertarineqarpoq.

Meeqqanik sullissisut assigiinngitsut sulinerminni meeqqanik eqqugaasimasunik sullissisut peqatigiiffimmi ilaasortaapput.

Inuit 265-it missaat Nunanit Avannarlernit tamaneersut Nuummi ataatsimeersuaqataapput taakkunani nunatsinneersut 125-t sisamanngornerup tungaanut ataatsimeersuassallutik.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq