Narsami pisoq pillugu suliami eqqartuussut: Unnerluutigineqartoq tarnikkut katsorsarneqaannassaaq

Unnerluutigineqartoq 21-nik ukiulik Narsami siorna aallaasersorneq kiisalu Nuummi pineqaatissinneqarsimasunut inissiisarfimmi nakuuserneq pissutigalugit piffissami killiligaanngitsumi Danmarkimi tarnikkut katsorsarneqaannassaaq.

Allattoq Helle Nørrelund Sørensen

marsip 22-at 2024 07:00

Nutserisoq Connie Fontain

Angut 21-nik ukiulik Narsap aqquserngini heliportillu eqqaani siorna aallaasersortoq unnerluussisussaatitaasup, Martin Strandby Nielsenip piumasaqaatigisaatut tallimanngornermi pineqaatissinneqarpoq, pineqaatissiissullu 21-nik ukiullip akueraa.

Tassa danskit napparsimmaviani tarnikkut katsorsarneqarneq. Katsorneqarneq piffissamik aalajangiiffigineqanngitsut eqqartuussisup eqqartuussutigaa.

Unnerluutigineqartoq unnerluussisussaatitaasup unnerluussissutigisaanut pissutsinut 28-nut tamanut eqqartuunneqarpoq.

Unnerluutigineqartup eqqartuussinerup ulluini siullermi pissutsit tamarmik nassuerutigai.

SULIAQ NAATSUMIK

Siorna marsip 22-ani angut taamani 20-nik ukioqartoq Narsami aallaammik seqqortaarpoq.

Angut inunnut illup qaaniittunut, illumut qulimiguuliullu milersup tungaanut seqqortaarpoq. Tamanna nalunaaquttap 16.30-p aamma 17.15-ip akornanni pivoq.

Unnerluutigineqartoq maanna 21-nik ukioqarpoq, taannalu 14-inik toqutseriarsimasutut unnerluutigineqarpoq. Angut nassuerutiginnippoq.

Angut Aarhus Universitetshospitalip Tarnikkut napparsimasunut immikkoortortaani paarineqarluni tigummigallarneqarpoq.

Taamaammat eqqartuussivimmi suliaq Aarhusimi eqqartuussivimmi sapaatip akunnerani matumani ataasinngornermit tallimanngornermut suliarineqarpoq.

Eqqartuussisoqarfik Kujallermi sapaatip akunnerani eqqartuussineq taamaalilluni naammassineqarpoq. Suliarli immikkut illuinnartuuvoq, taannami Aarhusip eqqartuussiviani ingerlanneqarpoq.

Tamanna unnerluunneqartup Aarhus Universitetshospitalip tarnikkut napparsimasunut immikkoortortaqarfiani paarineqartuni tigummineqarallarneqarneranik pissuteqarpoq.

Illup qulimiguuliullu tungaanut seqqortaartoq

Narsami 2023-mi marsip 22-ani aallaasersorneq eqqartuunneqartup oqarnera naapertorlugu angutit marluk umiarsualivimmi ullut marluk sioqqullugit kamaassimanerannit aallaaveqarpoq.

Angut taamani 20-nik ukioqartoq ullormi aallaasersorfiusumi angutinut marlunnut illup qalianik suliaqaleruttortut tungaannut arlaleriarluni seqqorpoq.

Seqqornerit illumut pingasunit illumit qimaasariaqartunit isersimaffigineqartumut aamma torarput.

Angut eqqartuunneqartoq tamatuma kingunitsiagut Narsami heliportip tungaanut ingerlaqqippoq, inuillu aqqanillit qulimiguulimmit meqqammerluinnartumut ilaasut tungaannut seqqortaalerluni.

Aamma atuarukPineqaatissinneqarsimasunut inissiisarfimmi nakkutilliisoq unnerluutigineqartup nappaataanik ilisimanninngitsoq

Qulimiguulimmi aquttoq ilaasorlu ataaseq taakku qulimiguulimmit qimaaniarnerminni nullumikkut eqqorneqarput. Tamatuma saniatigut qulimiguulimmi aquttup aappaa qulimiguuliup igalaavata aserorneranit igalaaminernik eqqorneqarpoq.

Gummigedimik aquttoq heliportip eqqaaniittoq gummigedip igalaavata aserorneranit igalaaminernik aamma ikilerneqarpoq.

Angut 21-nik ukiulik heliportip eqqaani politiinit tigusarineqarpoq.

Tamatuma kingorna Nuummi Pineqaatissinneqarsimasunut inissiisarfimmi kingornalu Aarhus Universitetshospitalip tarnikkut napparsimasunut immikkoortortaqarfiani tigummigallarneqarpoq. Angut pineqaatissinneqarsimasunut inissiisarfimmi nakuusernerit arlallit kingunerisaanik nuutsinneqarsimavoq. Pissutsit taakku eqqartuussinermi maanna naammassineqartumi aamma unnerluussissutigineqarput.

21-nik ukiullip unnerluutigineqartup killisiorneqarnerani angut aallaasersornissani sioqqullugu kamassaqangaatsiarsimasoq Narsamilu innuttaasunik toqutsinissamik kissaateqarsimasoq saqqummiunneqarpoq.

Peroriartornera sakkortullunilu tarnikkut napparsimasoq

Eqqartuussutip saqqummiunneqarnerani eqqartuussisoq ima oqarpoq:

- Suliaq una annertoqaaq, illillu iliuuserisat ilungersunartorujussuuvoq. Inuillu uku pinerlisatit inuunerminni ikiligaapput.

Unnerluutigineqartoq peroriartornermini sumiginnagaangaatsiarsimasoq, matumani angerlarsimaffimmi nakuusertoqartarsimasoq aamma imminut toqoriarsimasoq saqqummiunneqarpoq. Tamanna politiit nalunaarsorsimavaat.

17-inik ukioqarluni nammineerluni kommunimut saaffiginnippoq inissinneqarnissaminillu qinnuteqarluni.

Kommuneqarfik Sermersuumili isumaginnittoqarfik unnerluutigineqartup peroriartorneranut atatillugu annikitsuinnarmik paasissutissiissutissaateqarpoq, matumani angajoaqqaavi taassuminnga qatanngutaanillu isumassuinissamut piginnaasaqanngitsut.

Aamma atuaruk Narsami pisimasumik suliaq: Portørip inuit ikinnerpaamik qulit aallaasersortoqarneranit annaakkai

Unnerluutigineqartup tarnikkut misissorneqarnerani nalinginnaasumik silassorissuseqartoq, ilaatigulli toqutsisutut misigisuusisarluni tarnikkut peruluttuusoq paasineqarpoq. Narsami aallaasersornermini aamma tarnikkut perulussimassasoq nalilerneqarpoq.

Eqqartuussisoq ima oqarpoq:

- Qaniginerpaasannit pisortaqarfinnillu annertuumik sumiginagaassimavutit, tamannalu uggornartorujussuuvoq meeqqamik kimilluunniit misigineqartussaanngikkaluarpoq. Neriuppugut Aarhus Universitetshospitalimit ikiorneqarluarumaartutit.

Eqqartuussivimmi suliap ingerlanerani ukiuni arlalinni kamassimasutut misigisimalluni, ullumikkulli Danmarkimi tarnikkut katsorsarneqarami ajorani arlaleriarluni oqaatigaa.

Taassuma maanna inissinneqaqqaffigisani Aarhus Universitetshospitalip tarnikkut napparsimasunut immikkoortortaqarfia imminut inissisimaffissatut pitsaanerpaasutut isigaa.