Ulloq unnuarlu nalunaarusiaq: Nanortalimmi nannumik takusoqarpoq

Nanortalimmi nanoq arfininngormat ullaakkut takuneqarpoq, taanna eqqaassanngikkaanni unnuaq nalinginnaasoq ullorlu nalinginnaasoq eqqissisimasorlu, politiit pigaartuisa pisortaat Anette Ostenfeldt ilisimatitsivoq.

Naak politiit pisoq pillugu ataasiinnarmik nalunaarfigineqaraluartut, nanoq illoqarfimmi innuttaasunut qaninngoorpoq.

-Nittartakkatigut attaveqaqatigiittarfitsigut takusinnaavara illunut qaninngoorsimasoq, kisianni tamanna nalunaarutiginnittoqarneranik kinguneqanngilaq,  Nunatsinni Politiit pigaartuisa pisortaat, Anette Ostenfeldt, oqarpoq.

Kalaallit Nunaanni Politiit nannumik takunniffiusuni najuupput, nanorlu maannakkut qimaatinneqarsimalereerpoq.

Imaanut pississimavoq nalullunilu ingerlaqqereersimalluni, takunnittuniillu oqaatigineqartut naapertorlugit, tassanngaanniit sumiiffik alla qaqiffigisimavaa, inuillu ilaasa nakkutigisimavaat illoqarfimmut uteqqinnginnissaa qulakkeerniarlugu, pigaartut pisortaat oqaluttuarpoq.

Taamaammat politiit maanna iliuuseqarnerusariaqanngillat.

- Suliaq naammassineqarpoq, uteqqissappalli suliaq aallarteqqikkumaarpoq, Anette Ostenfeldt ilisimatitsivoq.

Qaammatit marluk ingerlaneranni, Kujataani illoqarfinni nannunik pingajussaanik takusoqarpoq.