Nammineq videoliat KNR-imi isiginnaagassianngortiguk

Ilaqutariinnut toqqaannartumik aliikkutassiatut aallakaatitassiaq nutaaq KNR1-ikkut sapaatip-akunneranut ataasiarluni aallakaatinneqartartussaq nutaaq "Tallimanngorneq Unnuppaat Man" tallimanngornermi septembarip ulluisa tallimaanni siullerpaamik unnukkut arfineq-pingasunut qiteqquppat aallakaatinneqassaaq. https://www.facebook.com/unnuppaatman
Allattoq Mads Lynge
aggustip 28-at 2014 13:51

- Tamanna allaanerusutut aliikkusersuilluni aallakaatitsinerussaaq aallakaatitsivimmiissallutik nuannersut Mala Johnsen aamma Jens-Christian Jacobsen.

- Aalajangersimasunik nipilersortartoqassaagut, timersornerup silarsuaanit ilanngussaqartassalluni, kulturimut tunngasuni aamma isiginnaartartunut ornigullutillu isiginnaartunut tallimanngornerit tamaasa immikkut toqqakkanik ilanngussisoqartartassalluni, KNR-ip pisortaa Søren Lennert Mortensen oqarpoq.

Aallakaatitassiami nutaami sammiuagassaq tassaavoq inuit namminneq videoliaat - isiginnartut namminneq videoliorlutik aammattaaq internetimit takutitassiamernit. Isiginnartartut periarfissinneqassapput namminneq imminni videoliaminnik quianartunik, nuannersunik aamma aliikkusersuinermik takutitsisunik nassitsisarnissaminnut, taakku SMS-erluni taasisitsinikkut sapaatip-akunneranni videoliullammattut toqqarneqarsinnaassallutik.

Videoliat ajugaasut ingerlaqqittassapput, isiginnaartut ukioq manna nammineq videoliullammattut 2014 pillugu taasitinneqartassallutik. Ajugaasoq angalanissamut 25.000 koruuninik aningaasartalinnik tunissuteqarfigineqassaaq, immikkullu eqqugassatut sms-erlutik taasinermi tamani pissarsiarineqarsimasut akornanni makitsisoqarumaarpoq, smart-tv pitsassuaq tassani eqqorneqarsinnaassalluni.

Sumut qanorlu iliorluni videolianik KNR-imut nammineq nassitsinissaq Facebookimi takuneqarsinnaavoq, tassa www.facebook.com/unnuppaatman iserfigalugu paasiniaasoqarsinnaassagami.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq