Nalunaarutip naammassineqarsinnaanissaa Aqqaluk Lyngep qularaa
- Uagut Issittumi ajornartorsiutigaarput nammineq uagut pisuussutitsinnik, nammineq piliatsinnik assatsinnik qarasatsinnillu piliatsinnik aningaasarsiuteqarsinnaanerup unitsinneqartarnera, taava tamakkinnga immikkut ilisimasallit aaqqinniarumaarpaat, kisianniuna suliassaq taanna annertoorujussuusoq oqimaattorujussuusussaallunilu. Taamaattumik imaaliallaannaq aaqqiissutissanik nassaartoqarsinnaanavianngilaq, ICC Internationalip siulittaasorisimasaa Aqqaluk Lynge oqarpoq, imalu nangilluni:
- Neriussaagut una aallaaviussasoq: Issittumi naggueqatigiit akornanni ajornartorsiutit siullerpaartaat tassaavoq ilinniarnikkut annertunerujussarmik periarfissaqarnikkut, taava imminut pilersornissamik aallaaveqartumik pisoqarnissaa. Taanna Nunatsinni ingerlalluartorujussuartut oqaatigisinnaavarput, pikkorissorpassuarnik massakkut naammassisaqartut inuusuttavut taakku neriuutissaraavut. Naggueqatittali akornanni ilinniartitaanikkut appasissorujussuupput, naak tuluttut oqalussinnaagaluarlutik, taamaattoq aamma suliffissatigut aamma killeqartarpoq, aningaasatigut soqutigisat allat aqutsinerat peqqutigalugu, Aqqaluk Lynge oqarpoq.
Naak Aqqaluk Lynge siulittaasutut tunuareeraluarluni, nalunaarutip Kitigaaryuit suliarineqarneranut taamaattoq ICC Kalaallit Nunaannut ikiuunnissani naatsorsuutigaa.
