Naligiissaarinissaq inerneqarpoq: Sermersuup 54 mio. koruunit pilliutigissavai

Kisitsisit ersarissunngorlugit imatut isikkoqarput:

Kommuneqarfik Sermersooq: -54 millionit koruunit
Qeqqata Kommunia: -3 millionit koruunit
Kommune Kujalleq: +23 millionit koruunit
Qaasuitsup Kommunia: +34 millionit koruunit

- Naalakkersuisut ilisimaaraat, 2015-mut ilusissatut aaqqiissutaagallartussatut aalajangerneqartoq kommunit tamakkerlutik nuannarivallaarnavianngikkaat.

- Naalakkersuisut aalajangernertik oqimaaqatigiiffiusutut nalilerpaat. Peqatigitillugu kommunit 2015-imut missingersuutiminnik suliaqarnissaannut piffissamik tulluartumik aamma periarfissiivoq, aningaasaqarnermut nunamullu namminermut naalakkersuisoq Vittus Qujaukitsoq, tusagassiorfinnut nalunaaruteqarluni taama allappoq.

Pisinnaasat malillugit aaqqiisoqarpoq
Tusagassiuutini sapaatit-akunnerini kingullerni ilusissatut taakkartorneqartartunit allaanerusumik toqqaasoqarpoq.

Ilusissiamulli Vittus Qujaukitsp juulip arfineq-pingajuani saqqummiussaanut assingusupilussuuvoq. Tassanimi Sermersooq 56 mio. kr.-inik Qeqqatalu 12 mio. kr.-inik tunniussaqartussaapput Kujallerlu 22 mio. kr.-inik Qaasuitsorlu 46 mio. kr.-inik pissarsillutik.

- Aaqqiissutaasoq naalakkersuinikkut naaperiaatigineqartut pitsaanerpaajorigunanngilaat, pisinnaasalli malillugit aaqqiissutaalluni.

- Naalakkersuisut Natsorsueqqissaartarfik, kommunit aamma Kanukoka peqatigalugit 2016-imut naligiissaarinermik aaqqissuussinissamut paasissutissanik tunngaviusussanik pitsaanerusunik suliaqarnissaq pingaartillugu suliaqassapput, illuatungeriit isumaqatigiissutigisinnaasaannik, Vittus Qujaukitsoq tusagassiorfinnut nalunaaruteqarluni taama allappoq.

Naligiissaarinermut isumaqatigiissut 2015-imuinnaq atuutissaaq.

Pingasunngornermi Qanorooq-mi borgmesterinit sisamaasunit pingasut nal. 19.00 pulaartorineqassapput.