Naalakkersuisut aalisartitseqatigiiffinnut paatsuungasunut saassussipput

Aalisarnermik ingerlatseqatigiiffiit aningaasaqarnerminnit ingerlatsinerminnillu paasissutissaataannik Namminersorlutik Oqartussat pissarsisinnaanngillat.

Paasissutissat Naalakkersuisut aalisarnermut politikkissaannut aamma inuiaqatigiit aalisagaataasa ilanngartornerannut akitsuusersuinermi tunngavissatut pisariaqartippavut.

Aalisarnermut naalakkersuisoq Siumumeersoq Finn Karlsen, taama oqarpoq. Taassuma kikkut pisuusut qularutiginngilaa.

- Aalisariutaatillit paasissutissanik tunniussisarnissartik tunuarsimaarfigisarmassuk, Finn Karlsen oqarpoq.

Taama oqarneq Kalaallit Nunaanni Sulisitsigut Peqatigiiffianni pisortap tupigusuutigaa.

- Finn Karlsenip taama ilillugu oqaatigimmagu soorunami ajorusuutigaarput, ilisimasaqarnerusimasariaqaraluarpormi, GA-p pisortaa, Brian Buus Pedersen oqarpoq.

Ingerlatseqatigiiffiit paasissutissaataannik tunniussisarnissamut GA aalisarnermillu ingerlatseqatigiiffiit akerliusimangilluinnartut, taassuma tikkuarpaa.

-  Paasissutissanik, sapinngisamik assiiaartunik imaqartunik, Namminersorlutik Oqartussanut tunniussinermi immersortagassamik ilusilersuilluta nukippassuit atoreerpavut, tamannalu Finn Karlsenip ilisimasariaqaraluarpaa, Brian Buus Pedersen oqarpoq.

Taannali isumaqarpoq, Namminersorlutik Oqartussat paasissutissarpapilussuarnik nassissortassagaanni isumatusaarnerussanngitsoq.

- Namminersorlutik Oqartussat nalunaarutaatigut nutaakkut paasissutissanik tusintilikkaanik, paatsiveerussaataaginnartussatut qularutiginngisatsinnik, piumasaqarnertik pikkunarsaavillutik nalunaarutigaat, sulisitsisut peqatigiiffianneersoq oqarpoq.

Finn Karlsenilli tikkuarpaa, paasissutissat nutaat Naalakkersuisut pisarialimmik tamakkiinerusumik isiginnilernissaannut pisariaqartut, aalisakkat isumalluutit nungukkiartunngitsumik aalisarneqarnerannik malitseqartussamik.

Aammami Brian Buus Pedersenip erseqqissarpaa, Finn Karlsenip aalisarnermit paasissutissat pigisariaqarai tunngaviatigut isumaqataagamik. Taamaattorli naalakkersuisunut kaammattuuteqarpoq.

- Isumaqatigiissutigeqqaarallartigu, inuppassuit piffissaajanngikkaluarlugit paasissutissat, iluaqutaasumik atorsinnaasatik, qanoq ilillutik pissarsiarissaneraat, Kalaallit Nunaanni Sulisitsigut Peqatigiiffianni pisortaq Brian Buus Pedersen, kaammattuivoq.