Naalakkersuisut aalisakkat tamarmik akitsuuserneqarnissaat siunnersuutigaat

Naalakkersuisut Aningaasanut Inatsisissatut siunnersuutaat malillugu avaleraasartuunik aalisarneq akileraarusersorneqassaaq, taamaaliornikkut 90 million koruunit pissarsiariniarneqarput. Avataasiorlutik raajanik, qaleralinnik avaleraasartuunillu aalisartut siunissami kisimik aamma akileraarusersorneqartarunnaassapput.

Aalisakkat suulluunnit qaqinneqartartut tamarmik inuiaqatigiinnut iluaqutissanngortinniarneqarput, tassanilu avataasiorluni sinerissamilu qanittumi aalisarnikkut qaqinneqartartut tamarmik assigiimmik pineqalernissaat eqqarsaataavoq. Aalisakkat suulluunnit, soorlu saarulliit, suluppaakkat nipisaallu qaqinneqartut amerlappata akileraaruserneqartalissapput.

Islandimiut periusaat

Aalisakkanik sunilluunnit akileraarusersuineq Islandimi atugaareersoq soqutigalugu Aningaasaqarnermut Naalakkersuisoq Vittus Qujaukitsoq aasaq manna oqarpoq, aalisarnermilu akitsuutinik tamanik misissuisussanik suleqatigiissitaliortoqarsimanerarlugu. Suleqatigiissitap taamani misissugaasa ilagaat Islandimiut assigiinngisitaartumik akitsuusersueriaasiat.

Islandimi aalisakkat tamarmik akitsuusersugaapput, akitsuutilli appasillutik, assersuutigalugu avaleraasartuunut akitsuut kiilumut 0,30 øreuvoq, nunatsinni maanna 95 øreulluni.

Nunatsinni umiatsiaararsorluni ilaatigut qaleralinniartarneq allanngortiteriffigineqassanngikkallartoq Naalakkersuisut aappaagumut inassutigaat.

AAMMA ATUARUK Islandimiutut akitsuusersuissaagut?

Aalisarnermi ineriartortitsinermut 20 million koruunit ukioq manna atugassiissutigineqaraluartut Naalakkersuisut aappaagumut immikkoortitsinissamik siunnersuuteqarnissamik pilersaaruteqanngillat.

KNAPK-p siulittaasua Henrik Sandgreen atorfilittanilu naatsorsuillutillu oqaloqatigiileruttormata oqaaseqartissinnaanngikkallarpavut.