- Akisussaaffik ilissinnut maanna ingerlateqqippara.

Meeqqanut inuusuttunullu naalakkersuisup, Aqqaluaq B. Egedep marlunngornermi ualikkut ’Isumassuineq salliutillugu’ qulequtaralugu tusagassiortunik katersortitsinermini pingaarnertut tamanna oqariartuutigaa.

Tusagassiorfiit sapaatini akunnerni kingullerni allaaserisai, ilaatigut Nuuk Outdoor meeqqanut Kommuneqarfik Sermersuumit pinasuartumik inissinneqarsimasunut akisussaasuusoq KNR-ip ilaatigut allaaserisaa, aammali meeqqat Sisimiuni hashimik pujortarniarlutik imminut atortittartut pillugit saqqummiunneqartut tunuliaqutaralugit tusagassiortunik katersortitsisoqarpoq.

Meeqqat 737-t angerlarsimaffiup avataanut ullumikkut inissinneqarsimasuupput, ukiullu pingasut matuma siorna tassa 2021-mi nunatsinni kommunit meeqqanut inuusuttunullu susassaqarfiinut nalunaarutiginninnerit katillugit 4.892-iupput.

Nunatsinni meeqqat pitsaasumik ineriartornissaannut tamatta akisussaaffimmik tigusissasugut naalakkersuisup, Aqqaluaq B. Egedep tusagassiortunik katersortitsinermi kaammattuutigaa.

Inuussutissarsiortunut inissiisoqarnissaanik pinaveersaartitsinissamik siunnersuuteqartussanut aamma taama kaammattuuteqarpoq.

Itinerusumillu iserfiginagu. Tassungalu taarsiullugu maanna qanoq pisoqarnissaanut akisussaaffik tamarmi akisussaaffigiumanngilaa.

Nipi allanngortoq

Politikkip tungaaniit suleqatigiissitamik pilersitsisoqarnikuuvoq. Taanna naalakkersuisup juunip qaammataani pilersippaa, tassungalu atatillugu allamik iliorsinnaanngissorivoq.

- Suliarisimasara tassaavoq siorna suli tusagassiorfitsigut saqqummiunneqanngikkallarmat augustimili ajornartorsiut pitsaaliorlugu suleqatigisimavarput   kommune taamatut killittoqaqqinnginnissaa siunertaralugu suleqatigiissitaliorluta suleqatigiissitap taassumap ersersippaa una pisoq uteqqissanngippat malittarisassat suut qanorlu aaqqinneqassanersut.

Naalakkersuisunngoqqammerlunili inissiisarnermut tunngatillugu qanoq iliuuseqarniarnerluni KNR-imut juunimi oqaatigisaa allatut nipeqarpoq.

- Arlaatigut kommunit nukittorsaavigineqassappata politikkikkut isummerfigissavarput.

Nuuk Outdoor eqqaaneqanngitsoq

Suliat ullumikkut tusagassiortunik katersortitsisoqarneranut Nuuk Outdoor pillugu ilanngutassiat pissutaasut ilagaat. Taamaakkaluartorli naalakkersuisup suliaq tassunga tunngasoq toqqaannartumik eqqaanngilaa, ataatsimulli ’tusagassiuutini allaaserineqartut’ eqqartorlugit.

Aamma KNR-ip toqqaannartumik aperimmani eqqaanngilaa:

Nuuk Outdoor pillugu suliaq inissiisarfiit aningaasarsiutaaginnalernerannik takussutissiisoraajuk?

- Naalakkersuisutut erseqqissalaassavara tassa naalakkersuisuugama suliamik isumaginnittuunngilanga, sulianut ataasiakkaanut suliat ataasiakkaat qanoq malittarisassatigut ingerlanneqarsimanerat imaluunniit aningaasarsiorfissuaannartut oqaatigisinnaanngilara.

- Uanga naalakkersuisutut isumaqarpunga nalilersugassarinagu aningaasarsiorfissuunersoq imaluunniit meeqqanut pitsaanngilluinnartuunersoq pitsaalluinnartuunersoq, isumaqarpunga atuisut namminneq nalilertariaqaraat. 

Meeqqat aningaasarsiutaanersoq naliliissanersut, aningaasarsiutaanersoq, angajoqqaajunersut imaluuniiit allaanersut nalunarpoq, Aqqaluaq B. Egedemmi tusagassiortunik katersortitsineq apeqqutip kingorna matuaa.