Naaja Nathanielsen anguniakkanik aaqqissuusseqqinnissanillu ujartuisoq
Naalakkersuisut Inatsisartut ukiaanerani ataatsimiinnissaanni siunnersuutaannik, Naalakkersuisut siulittaasuat Aleqa Hammond saqqummiussereersorlu, Naaja Nathanielsen tusagassiuutinut taama nalunaaruteqarpoq.
Naalakkersuisut siulittaasuata Powerpointi atorlugu quppernernik 44-nik saqqummiussinerani suarsukujunnik saqqummiussisoqartoq, taassuma oqaatigaa.
AAMMA ATUARUK Ukiaanerani ataatsimiinneq: Akitsuutit suliffissaqartitsissasut
Siunnersuutit taamaallaat pingasut siumut isigisuusut, Naaja Nathanielsen isumaqarpoq, tamarmillu immikkut aamma aporfissaqartut oqaatigalugu.
Siulleq tassaavoq siunissami suliffissaqartitsinissamut periusissaq. Piffissaq 2014-2017 taamaallaat matumani pineqartoq, Nathanielsenip maluginiarsimavaa:
- Tamatumalu Naalakkersuisut ajornartorsiutaat ersersippaa. Siumut isigisumik eqqarsarnissaq ajornakusoorpoq, qinigaaffiusoq kisiat eqqarsaatigigaanni. Piviusorpalunngeqaaq ukiut marluinnaat periarfissaralugit suliffissaaleqinerup affaannanngortinniarneqarnera suliniuteqarfiginiarneralu, Naaja Nathanielsen allappoq.
AAMMA ATUARUK Naalakkersuisut takornariat akiliutaat atorunnaarsinniaraat
Qaqortumi mittarfiliortoqarnissaanik Naalakkersuisut siunniussaqarnerat, taassuma aamma apeqquserpaa. Naak siunnersuut imminermi ajorinngikkaluarini, mittarfiliorniarnermi akissaqarumalluni sanaartugassanut allanut aningaasaliissutissanik ikilisaaniartoqarnera aamma aarlerinartoqartippaa:
- Taamaammat eqqortumik aperisoqartariaqarpoq, maannakkorpiaq inissiat amerlanerit mittarfilluunniit nutaaq pisariaqartinneqarnerpaanersut, IA sinnerlugu Inatsisartuni ilaasortaq Naaja Nathanielsen tusagassiuutinut nalunaarummi ilaatigut allappoq, Nunatsinni attaveqaateqarneq ataatsimut isigalugu Naalakkersuisut takorluukkaminnik suli saqqummiussisimannginnerat aamma eqqaasitsissutigalugu.
