Naaja N. Naalakkersuisunut inissiat pillugit isorinnittunik apeqquteqalersoq

IA sinnerlugu Inatsisartunut ilaasortap Naaja Nathanielsenip, tarnimikkut nappaatillit Namminersorlutik Oqartussat inissiaataanneeqqusaajunnaarnerannik aalajangertoqarsimaneranut tunngatillugu inunnik isiginnittaaseq "akarnaatsutut" isigalugu nassuiaasoqarnissaanik piumasaqarniarpoq.
septembarip 11-at 2014 14:38

Namminersorlutik Oqartussani Ineqarnermut Naalakkersuisoqarfiup tarnimikkut nappaatillit inissianit attartortakkanit nalinginnaasunit nuutsinneqarnissaannik kommunimut piumasaqaateqarnermigut inuttut pisinnaatitaaffiit unioqqutippai. Tamannami Naalagaaffiit Peqatigiit inuttut pisinnaatitaaffiit pillugit isumaqatigiissutaannik unioqqutitsineruvoq.

Tamannalu tunngavigalugu Naaja Nathanielsen Naalakkersuisunut § 37 naapertorlugu apeqquteqaateqarnialerpoq. Tarnimikkut nappaatillit Namminersorlutik Oqartussat inissiaataannit mattunneqarnissaannik aalajangerneq Naalakkersuisut inuttut pisinnaatitaaffinnut naapertuunnasorineraat ilaatigut apeqqutiginiarpaa.

Naaja Nathanielsenip aamma apeqqutigaa, inissianut namminersorlutik oqartussanit pigineqartunut mattussisoqarnera  inuiaqatigiinni eqimattakkuutaanut allanut kingusinnerusukkut atuuttunngortinneqassanersoq? Inatsisartunut ilaasortap aamma paaserusuppaa taamatut aalajangiisoqarneranut suna toqqammavigineqarnersoq?

Ineqarnermut Naalakkersuisoqarfiup Kommuneqarfik Sermersuumut allagaqaataanik KNR-ip ullumi sisamanngornermi ualinerani saqqummiussaqarnerata kingorna, § 37 naapertorlugu apeqquteqaateqartussanngorpoq.

Allagaqaammi pineqartumi naalakkersuisoqarfik allappoq, kommuni tarminikkut nappaatilinnik inissianut namminersorlutik oqartussanit pigineqartunut siunissami innersuusseqqissanngitsoq.

Danmarkimi inuttut pisinnaatitaaffiit pillugit misissuisoqarfiup allakkat atuareerlugit nalilerpaa, tamanna Naalagaaffiit Peqatigiit Innarluutillit pillugit isumaqatigiissutaanni malitarisassanik Naalakkersuisunit pisussaaffigineqartunik unioqqutitsinerusoq.

Ineqarnermut naalakkersuisoq Siverth K. Heilmann KNR-imit attaveqarfigaarput, taassumali atorfilittani oqaloqatigeqqaartinnagit pisoq tusagassiuutitigut oqaaseqarfiumanngilaa. Aqaguli tallimanngornerup ingerlanerani oqaaseqarfigissallugu neriorsuivoq.