Mittarfeqarfiit timmisartuaqqat aquttoqanngitsut inerteqqutigaat

Ima nuannarineqartigaat - allaat Mittarfeqarfiit - maani atorneqarnissaannut mianersoqqusisariaqarlutik.

- Inuit ataasiakkaat suliffeqarfiillu tamakku atorneqarnissaanut malittarisassanik ujartuillutik Mittarfeqarfinnut saaffiginnittarnerat akulikilligaluttuinnartoq, Mittarfeqarfiit allapput.

- Akisarpavut timmisartuaqqat aquttoqanngitsut mittarfiit heliportillu eqqaanni fem kilometerisut annertutigisup iluani atoqqusaanngimmata. Imaappoq assersuutigalugu tamakkuninnga atuineq Nuummi inerteqqutaalluinnarmat, Mittarfeqarfiit erseqqissaapput.

Taama inerteqquteqarnerup silaannakkut angallanermi malittarisassat nunarsuaq tamakkerlugu atuuttunut naapertuuppoq. Amerlasuulli tamanna tusaraangamikku tupaallattarput, soorlu internetikkut pisiniarfinniluunniit aquttoqanngitsunik timmisartuararsisimagaangamik.

Taamaattumik Mittarfeqarfiit mittarfiit Kallallit Nunaanniittunut tamanut nalunaarfigisimavaa, malittarisassat eqiingaffigeqqullugit, innuttaasullu saaffiginnikkaangata nassuiaattaqqullugit.

Aquttoqanngitsumik timmisartuaraqaraanni pisussaaffiliivoq taamaattut qanoq atorneqarsinnaanerannik malittarisassanik malinninnissamut.

Maannamulli timmisartuaqqat silaannakkut angallannermut akornusersuisimanngitsut ulorianartorsiortitsillutilluunniit Mittarfeqarfiit tusagassiuutinut nalunaarumminni allapput.