Meeqqat ulluanni toqqannartumik TV
Nuup illoqarfiata qeqqani eqqaassutissat Amisut eqqaat ualimut tv-mut aallakaatitsivinngussaaq. Tassanngaanniit meeqqanut aallakaatitassiaq Pikkorissuaqqat aamma aliikutassiaq Tamassa toqqaanartumik aallakaatinneqassapput.
Pikkorissuaqqat toqqaannartumik aallakaatinneqassapput nalunaaqutaq 17.30-miit Tamassalu nalunaaqutaq 18.00 toqqaannartumik Amisut eqqaanniit aallakaatinneqassalluni.
Igasoq Aage Lennert Olsen aapperluni grillerissaaq, Assavut assassukkaminnik saqqummersitsissapput tuniniaallutillu naatsiianik qanoq naatitsisinnaanermut ilitsersuisoqassaaq. Umiatsiamik saqqummersitsisoqassaaq qanorlu isumannaatsumik angalasoqarsinnaaneranik siunnersuisoqassaaq angallatillu atortorisassaannik takutitsisoqassalluni. KNR Radiomiit Labrador Kangian 2.0-miillu pulaartoqassaagut. Aasaanerani Nuummi meeqqat qanoq pilersaaruteqarfigineqarpat, sinerissami timersuutit suut sumilu ingerlanneqassanersut oqaluttuarineqassapput, soorlu isikkamik arsaannissat pikkorissartitsinissat qaannamik unammersuarnerit, spejderit qanoq pilersaaruteqarnersut il.il.. Aammalu Saligaatsoq 2012 qanoq pilersaaruteqarfigineqarnersoq tusagaqarfigissavarput aammalu kommunefodgedit pikkorissarsimanerannut tunngasunik tusagaqassalluta, KNR nalunaarpoq.
