Meeqqat pisinnaatitaaffiisa qanoq ilinniartitsissutigineqartiginerat allanngorarpoq

Meeqqat pisinnaatitaaffiinik suliaqarfik, Meeqqat Inuusuttullu Oqaaseqartartuat, MIO, Ilinniarnermik Ilisimatusarfik suleqatigalugu misissuisitsilerpoq, meeqqat atuarfianni inuit pisinnaatitaaffinik, meeqqallu pisinnaatitaaffiinik qanoq annertutigisumik ilinniartitsisoqartigisarnera qulaajarneqaqqullugu.
Allattoq Mads Lynge
apriilip 23-at 2014 07:08

MIO Ilimmarfillu misissuisitsisuupput, Inuillu Pisinnaatitaaffiinut Kalaallit Nunaata Siunnersuisoqatigiivisa aningaasanik tapiissuteqarnerat ilaatigut pissutaalluni piviusunngortinneqarsinnaasimalluni.

Misissuinermi inernerit Naalagaaffiit Peqatigiit nunani tamalaani meeqqanut ullorititaanni ukioq manna juunip aallaqqaataani saqqummiunneqarsinnaanissaat, MIO-p, Ilinniarnermik Ilisimatusarfiup, Inuillu Pisinnaatitaaffiinut Kalaallit Nunaata Siunnersuisoqatigiivisa neriuutigaat.

Inuttut pisinnaatitaaffiit, meeqqallu pisinnaatitaaffii meeqqat atuarfianni qanoq annertutigisumik ilinniartitsissutigineqartarnersut pillugit paasissutissat killeqartut nalunaarutigineqarpoq, Meeqqalli Inuusuttullu Oqaaseqartartuat Aaja Chemnitz Larsen tamanna pillugu ima oqaaseqarpoq:

- Meeqqat pisinnaatitaaffiisa ilisimaneqarnerannut ilinniartitsisut immikkut pingaaruteqarput. Misissuinermi inernerit siullerpaat takutippaat, meeqqat atuarfianni inuit pisinnaatritaaffiinik meeqqallu pisinnaatitaaffiinik ilinniartitsinerit assigiinngisitaartorujussuusut, Aaja Chemnitz Larsen, oqarpoq.

Misissuinermit paasisat ilaatigut tunuliaqutaralugit MIO-p meeqqat pisinnaatitaaffiinik ilinniartitsissutit nutaat, sungiusarnermut sammititaasut ineriartortillugit aallartippai, Inuit Pisinnaatitaaffiinut Kalaallit Nunaata Siunnersuisoqatigiivi tusagassiuutinut nalunaarummi ilaatigut allapput, pisinnaatitaaffiillu pillugit meeqqat atuarfianni ilinniartitsinerup siunissami annertunerulernissaa neriuutigineqarluni.

Meeqqat pisinnaatitaaffiinik ilisimasat meeqqanut inersimasunullu siuaruaanneqarnissaannut pisortat qulakkeerinninnissamut pisussaaffiat Naalagaaffiit Peqatigiit meeqqat pillugit isumaqatigiissutaanni artikel 42-mi allaaserineqarpoq.