Meeqqat nerisassaaleqisut iliuuseqarfigineqartut
Meeqqat qasusut - pinnguarnissaminnik nuannisarnissaminillu aallussilluarsinnaajunnaartartut Mælkebøttenimi sulisut nalaattarsimavaat. Tamanna meeqqat kaattarnerannik peqquteqartoq sulisut ukiuni kingullerni paasiartulerpaat. Taamaalilluni meeqqanut inuusuttunullu illumi pisortaq Kirsten Ørgaard sulisunilu aningaasanik katersissallutik aalajangerput. Mælkebøttenip ulloq unnuarlu paaqqinnittarfia meeqqat nerisassanik pisariaqartitsisut sallaallerfigisarsimagaluarpaat, taakkulu meeqqat qaarsillarnissaannut naammattarunnaasimapput.
Maannalu meeqqat mælkebøttenimiittartut inersimasut peqatigalugit sapaatip akunneranut marloriarlutik-pingasoriarlutik kissartunik nerisinnaalissapput.
- Nalunngilarput paqumigineqartoq misigissutsinillu qaffakaatitsisartoq ammaanitsinni attoripput. Nalunngilarpummi tamatta angajoqqaat meeqqatik pitsaanerpaamik perusuttaraat, meeqqalli kaattut nerisassanillu pisariaqartitsisut isiginngitsuusaaginnarsinnaanngilagut. Tamaammallu uagut ikiuerusuppugut, Mælkebøttenimi pisortaq, tarnip pissaasanik ilisimasalik, Kirsten Ørgaard, taama oqarpoq.
Igaffik sannaviusimasumi pilersinneqarpoq, meeqqanit atorneqarpiarneq ajormat. Taannalu igaffinngortinneqarpoq.
- Manna sannaviunikuuvoq, maannalu igaffinngorpoq nerisarfittaqartoq, Kirsten Ørgaard qungujulalluni oqaluttuarpoq.
Meeqqat eqqaavinni containerini sinnikusiortarput
Kisitsisit Kalaallit Nunaani Naatsorsueqqissaartarfimmeersut takutippaat, Nunarput tamakkerlugu meeqqat pingajorarterutaat, tassa 5000-it missaanniittut ajornakusoorluinnartumik inissisimasut. Meeqqanik kaattoqarneranik Mælkebøttenimi maluginiagaqarneq, meeqqanik ilisimasallip Radioaviisimut uppernarsarpaa. Arnaq aterminik taaserusunngitsup meeqqanik ukiorpassuarni nunatsinni sullissereerluni misigisaminik Radioaviisimut oqaluttuarpoq, meeqqat ilaat atuarfiup matunissaata tungaanut atuarfimmiittartut nerisassat atuarfimmit tunniunneqartartut sinnikui angerlaanniarlugit, qatanngutini allat angerlarsimaffimminniittut nerisassaqarniassammata. Taassumallu meeqqat ataasiakkaat naammattoortarsimavai pisiniarfissuit eqqaaviini containerini nerisassanik sinnikusiortartut.
