Meeqqat imigassamik tupamillu atuinerat annertuallaarujussuartoq
Misissuisitsinermi paasineqarpoq, meeqqat akornanni 24 %-it - tassalu meeqqat sisamararterutingajaat - suli 14-iliinatik imigassartorsimasut.
22 %-it tassalu amerlaqatingajaat hashimik misiliisimapput. 18 %-it naamaarneq misilissimavaat meeqqallu pingajorarterutaat sinnillit 13-it inorlugit ukioqarlutik pujortalersarput.
Kalaallit Nunaat taamaasilluni Europami Amerikallu Avannaani nunanut 70-inut sanilliullugu meeqqanik pujortartoqarnerpaajuvoq.
Kisitsisit ernumalersitsipput
Misissuisitsinermi paasineqartut tunuliaqutarlu ernumanartoq tunngavigalugu Peqqissutsimut Attaveqarnermullu Naalakkersuisoqarfik pinaveersaartitsineq annertusaavigalugu iliuuseqalerpoq.
Meeqqat atuarfii inuusuttullu ilinniarfii atuagaaqqanik meeqqat inuusuttullu aanngajaarniutinik navianartunik atuiaarpallaarnissamut naaggaarsinnaanissaannut atortussanik tigusaqaqqammerput.
Siusinaartumik iliuuseqartoqassaaq
Atortussiat 1. klassimiit atorneqassapput atuarfiillu aanngajaarniutit tupatornerlu pillugit politikkimik ersarissumik atuartunit, angajoqqaanit ilinniartitsisunillu atorneqarsinnaasumik ineriartortitsinissaat piviusunngortinniarneqarpoq.
- Siusinaartumik iliuuseqarusuppugut. Meeqqat inuusuttullu pitsaasunik peqqinnartunillu ileqqoqalernissaannut atuarfiup angajoqqaallu iliuuseqarnerat tamatumunnga aalajangiisuussaaq Peqqissutsimut Naalakkersuisoq Steen Lynge erseqqissaavoq.
