Maskoti qanoq ateqassava?
Puisinnguaq sapiippaseqisoq 2016-imi Arctic Winter Gamesertoqarnissaanut pilersaarusiortut toqqarsimavaat, maskotillu atserneqarnissaanut innuttaasut ikiortiserineqarput, unammisitsisoqassagami.
Arctic Winter Gamesip maskotissaa siorna decembarimi nassaarineqarpoq. Paamiuni 4.klassimi atuartup Stella Josefsenip, puisinnguaq titartaramiuk. Stellap titartagaa, uumasunik assigisaanillu inuttut pissusilersortunik titartaallaqqissut ilaata Christian Fleischer Rexip, takujuminarsarlugu, atuutilivikkuni isikkussaatut titartaqqissimavaa:
- Sineriammit siunnersuuterpassuarnut nuannersunut kusanartunullu qujangaarpugut, minnerunngitsumik Paamiormiuqqanut 4.klassimi atuartunut ajugaasimasunut, 3000-it koruuninillu atuaqatigiittut nuannisaqatigiinnissaannut tunineqarsimasunut. Tassalu maanna pissanngatigalugu utaqqisussanngorparput taassuma maskotissatta, qanoq ateqarnissaanik siunnersuutaajumaartussat, Arctic Winter Games 2016-imi pisortaq Maliina Abelsen oqarpoq.
Kikkulluunniit siunnersuuteqarsinnaapput, siunnersuuteqaruillu qarasaasiatigut allallutit uunga nassiussinnaavat: awg2016@awg2016.gl, kingusinnerpaamillu apriilip 24-ani nassiunneqareersimassalluni.
Maskotip atserneqarnissaanut atatillugu unammisitsinermi ajugaasup aqqa Katuami aqaguani, tassa apriilip 25-ani suaarutigineqarumaarpoq, ajugaasullu gavekorti Air Greenlandimeersoq angalanissamut atorneqartussaq 5000-it koruuninik nalilik pissarsiariumaarpaa.
