Maniitsup Brugseneeraa ammaqqippoq

Brugseneeraq Maniitsoq iluarsaanneqareerluni ammarmat inuppaalussuit najuupput.
juulip 29-at 2014 08:41

Ataasinngornermi julip 28-ni nalunaaqutaq qulinut Brugseneeraq sapaatit akunneri marluk iluarsaanneqareerluni ammaqqippoq.

Brugseneeqqap pisortatigoortumik ammarnissaanut akunneq affaannanngortoq inuppaalussuit silami tunuleriiaallutik utaqqilereerput.

Immikkoortortaqarfimmi siulittaasup, Ulla Skiftep, qalersaq aappaluttoq qiorpaa, oqalugiaamminilu ilaatigut oqarluni:

- Maniitsormiunik ulloq utaqqisaq kiisami nallerpoq. Qangali pisiniarfiup iluarsaanneqarnissaa utaqqisimavarput ullumikkullu pisiniarfik kusanartumut nutaaliaasumullu tikilluaqqusinnaavassi.

Pisiniarfiup iluarsaanneqarnerata saniatigut puiaasanut utertitsivik nutaaq, iffiorfeeraq, slush ice maskiinalu nutaartaapput. Sapaatip akunneratalu tulliani seqerngup qinngorneranik sarfaliuummik ikkussuisoqassalluni.

- Pisiniarfik nutaaq iluarisimaaqaarput. Avatangiiserput mianeraarput taamaattumillu sapaatip akunnerata tulliani seqerngup qinngorneranik sarfaliuummik ikkussissaagut. Kalaallit Nunaanni Brugsenimut iluaqutaassaaq taamaattumillu pisiniarfinni allani ikkussuisoqarnissaa eqqarsaatigaarput, Kalaallit Nunaanni Brugsenimi siulittaasoq, Aalipaaraq Kretzmann oqarpoq.

Seqerngup qinngorneranik sarfaliuummik ikkussisoqarnerata kingorna naatsorsuutigineqarpoq ukiumut 70.000 koruuninik sipaartarnissaq.