Makisiluttut sunniuteqanngitsumik nakorsarneqartarput
Iisartakkalli annerusumik katsorsaataaneq ajortut piaarnerusumillu peqqissisitsisanngitsut, misissuinerit nutaat sukumiisut maanna paasinarsisikkaat, nutaarsiassaqartitsivimmi Reutersimi allaaserineqarpoq.
Katsorsaatit pillugit atuagassiami The Lancet-imi katsorsaatit pillugit misissuinerit takutippaat, nipaallisaatit iiorarneqartuartut tamakkua, makisikkut anniarnermut iluaqutaasinnaanngitsut.
- Makisikkut anniartunut tamanut paracetamol annialeqqaarnermi nipaallisaatissatut innersuussutigisartagaraluarput eqqarsaatigeqqittariaqalerparput, misissuinermi pisortaasoq ilisimatooq, Christopher Williams, University of Sydneymeersoq Reutersimut oqarpoq.
Reutersimi allaaserisaq naapertorlugu, makisikkut anniarneq nunarsuarput tamakkerlugu innarluuteqalertarnermut peqqutaasarpoq, maannakkullu paracetamol makisiluttunut tamanut annialeqqaarnermi nipaallisaatissatut innersuussutigineqartarluni.
Misissuinermi nutaami makisimmikkut anniartut 1.652-it misissorneqarsimapput, taakkualu sapaatit akunnerini sisamani misissorneranni ilaat paracetamolinik sinnerilu iisartakkanik malunnanngitsunik iisitinneqartarsimallutik.
Iisartakkat taakkua malunniunnerat assigiittoq, misissuinermi inerniliunneqarpoq.
Ungasinngitsukkut aamma nakorsat makisiluttunut innersuussutigaat siniffimmi innangannginnissaat. Makisilittut annialeraangamik aalajuartarnissaat innersuussutigineqarpoq.
