Mælkebøtten Nuummiittoq meeqqanut igaffimmik ammaasoq
- Nererusulluni aammalu angerlarsimaffimmi nerisassaqartinneqannginnerup oqaatiginissaa paqumigineqartarpoq. Maluginiarsimavarput meeqqat inuusuttuaqqallu piffissat ilaanni nerisassanik pisariaqartitsinerat matussuserneqarneq ajortoq, taamaammallu malugisarparput ilaatigut kaattartut, Mælkebøttecenterimi pisortaq Kirsten Ørgaard oqaluttuarpoq.
Tamannalu pissutigalugu sannaviusimasumi Meeqqanut igaffimmik pilersitsisoqarpoq. Igaffimmi tassani nerisoqarsinnaavoq, aamma meeqqat nerisassioqataasarnissaat siunertaavoq.
Nunatsinni meeqqat inuusuttullu 9 %-ii pissakilliortuupput
Meeqqat peqqinnartunik allangorartunillu nerisittarnissaat siunertaavoq, tamannami timikkut tarnikkullu nalinginnaasumik ineriartornissaannut tunngavissiisarmat – meeqqat Mælkebøttenimi nerisarsinnaanerat atugarissaarnerulernissaannut sunniuteqarsinnaammat immaqalu atuarfimmi malinnaasinnaanerulersillugit.
AAMMA ATUARUK Nuna tamakkerlugu meeqqanut neqerooruteqalerpoq
- Misissuinerit takutippaat Nunatsinni meeqqat inuusuttullu 9 %-ii pissakitsuullutik inuusut. Meeqqallu taakkorpiaat pingaarnertut sullikkusuppagut, Kirsten Ørgaard oqarpoq, erseqqissaatigaalu igaffimmi nutaami meeqqat kikkulluunniit, nerinissaannik neqeroorfigineqassasut, imaanngitsoq angerlarsimaffinni atugarliortut kisiisa nerisinnaassasut.
Igaffittaassaq aqagu ualikkut ammarneqassaaq.
