London Mining A/S-imut atuisinnaanermut akuersissut Naalakkersuisut atsiortussanngorpaat

Aatsitassanut naalakkersuisup Jens Erik Kirkegaardip London Miningimilu pisortaanerup Graeme Hossiep saviminissamik atuisinnaanermut akuersissut pillugu isumaqatigiissut ullaaq manna nalunaaqutaq qulinut atsioqatigiissutigissavaat.

Isumaqatigiissuteqarnikkut aatsitassarsiutileqatigiiffik Kapisillit eqqaanni Isukasiani nunamik saviminissaqarluartumik kisermaassilluni atuisinnaanermut akuerineqassaaq, akuersissuteqartoqarneratigullu aatsitassarsiutileqatigiiffik aningaasaliisussarsiorlunilu saviminermik pisisussarsiorsinnaanngussaaq.

Piiaavissap sanaartorneqarnera 14 mia. koruuninik akeqassangatinneqarpoq.

Ingerlatseqatigiiffilli akuersissummik tunineqaraluarluni, piiaavissamik sanaartorsinnaatitaananilu saviminissamik piiaasinnaatitaanngilaq. Taamaaliortoqassappammi Naalakkersuisut sanaartornermut ingerlatsinermullu akuersissummik tunniusseqqaartussaapput. Illuatungeriillu tamanna pillugu isumaqatigiinniarneri suli ingerlapput.

Nalunaaqutaq qulinut atsioqatigiinnissaq radiokkut TV-kkullu malinnaaffigineqarsinnaavoq, Qanorooq toqqaannartumik aallakaatitsissaaq aallakaatitsinerlu aamma KNR Radiokkoortinneqassalluni