London Mining aningaasatigut ilungersunartorsiortoq
Ingerlatsivik aningaasaliisinnaasumik suleqateqalernissaminik pisariaqartitsisupilussuuvoq, akiliisinnaassusaalu ima ajortigaaq, ingerlatsivik Sierra Leonemi piiavissuani ingerlatiinnarumallugu akisuupilussuarmik taarsigassarsisariaqarsimalluni.
Tamannalu Nunatsinnut tusarluarnanngilaq, London Miningimi piiaavissuarmik nunatsinni ammaalersutut aningaasaqarniarnitsinnullu ilungersunartumut isertitat nutaanik pilersitsisussasutut ukiumi kingullermi neriuutissatta annersaattut taakkartorneqartarpoq.
Atuisinnaanermut akuersissummik siorna tunineqarpoq
Ingerlatsivik Nuup Kangerluani saviminermik piiaanissamut akuersissummik oktobarip qaammataani tunineqarpoq, piiaviliornissamullu 12-15 milliardit koruuninik maannamut pissarsisinnaasimanngilaq, ilaatigut saviminermut akigitinneqartut maanna appasissumiimmata.
Peqatigitillugu Sierra Leonemi, Londonip Miningip saviminermik piiavissuata Marampap inissisimaffigisaani ebolamik nappaalasoqarpoq. Tamannalu ilungersunarnerulersitsiinnarpoq, naliliisartut arlallit oqarput, tamannami pissutigalugu immikkut ilisimasallit nunanit killerneersut tassungartinnissaat ajornarnerulissammat.
AAMMA ATUARUK London Mining A/S-imut atuisinnaanermut akuersissut Naalakkersuisut atsiortussanngorpaat
London Mining aningaaserivinnit marlunnit sapaatit-akunnerata siuliani 25.000 dollarsinik - tassalu 140 millionit koruuninik - akisuupilussuarmik taarsigassarsisariaqarsimavoq, Politiken taama allaaserisaqarpoq.
Taama akisutigisumik taarsigassarsisariaqarnerup takutippaa London Mining ilungersunartorsiortupilussuusoq, Thibault Lepouttre, nunarsuaq tamakkerlugu aatsitassarsiornermik suliffissuaqarnermik malinnaasoq oqarpoq.
Ingerlatsiviup aktiaatai ukiuni kingullerni naleerukkiartuinnarsimapput, ukiunilu naatsorsuuseriffiusuni kingullerni tallimani ukiut tamaasa amigartooruteqartarluni. Aningaasaliisartut aktianik apriilimi 2011-mi pisisut aningaasaliinermik 90 procentii sinnerlugit annaasimavaat.
Naliliisartullu naapertorlugit, ingerlatsivimmi aqutsinerliortoqarnera ajornartorsiutit annerit ilaginngilaat, savinerulli akiata appariartupiloornera pissutaalluni.
