Kuupik: Tupamik akitsuutitigut isertitat appariarneri uggorisariaqanngilarput
Imigassarmik tupanillu atuinerup annikilliartornerata ilutigisaanik Nunatta karsianut tamanna sunniuteqarpoq, tassa 61 millionit koruuninik annaasaqaataammat. Tamannali ugguaatigineqartariaqanngitsoq, Inuit Ataqatigiit siulittaasuat, Kuupik V. Kleist isumaqarpoq.
- Soorunami aningaasat siunertanut assigiinngitsorpassuarnut atorneqarsinnaaneri amigaataassooq. Illuatungaatigulli aningaasat isertitassaagaluit annaaneqartut ajunngitsumik tunuliaquteqarlutik annaaneqarmata, tassa peqqinnerulersimanitsinnik takussusiimmata, tamanna ugguaatigineqartariaqanngilaq, Kuupik V. Kleist oqarpoq.
Tassa akitsuutitigut isertitat 2012-imi 202 millioniusimariarlutik 2013-imi 141 millioniinnanngorsimapput.
Aningaasat taakku 61 millionit koruunit annaasaqaatigineqartut ugguarineqartariaqanngitsut, Inatsisartuni ilaasortap Kuupik V. Kleistip oqaatigaa.
Aamma atuaruk: Annikinnerusumik pujortarlutalu imigassartortalerpugut
Imigassamik tupamillu atuinikinnerulernerup kingunerisaani atuinerup kinguneranik aningaasartuutigineqartartut annikilleriarnissai neriuutigaa, taamaalilluni akitsuutinik qaffaaqqinnissaq pisariaqassanngitsoq neriuutigaa.
- Neriuutigisariaqarparput Peqqinnissaqarfimmut aningaasat atorneqartartut ikileriarnissaat. Akitsuutitigut annaasagut allatigut matussuserniarsarineqarnissaat ujarlerniarnerput ilugersuuterusussuartariaqanngilarput, tassami aningaasat isertitassaagaluartut ajunngitsumik kinguneqartumik isertinneqanngitsoorneri qujarutiinnartariaqarparput, Inuit Ataqatigiit siulittaasuat, Kuupik V. Kleist oqarpoq.
Nunatsinni tupamik tunisaqarneq ukiut 20-t kingulliit ingerlaneranni affaannanngorsimavoq, allaallumi 2012-imit 2013-imuinnaq ataatsimut isigalugu 35 procentimik annikillisimalluni.