Kuultit sisamaraartaraat

Kalaallit Arctic Winter Gamesimi peqataasut marlunngornermi ujaminnaqattaarput.
Allattoq Noah Mølgaard
marsip 07-at 2012 09:35

Unamminerit marlunngornermi ingerlaqqimmata kalaallit sisamanik kuultinnapput.

Minik Møller Platou inersimasut Dene Gamesimi eqitarneranni kuultinnappoq. Qisuk 25 centimeter illuttut amiliartortoq qaqorsaammik tanissinnaarlugu eqitartarpaat nussussisorlu ajugaasarpoq.

- Malugigakku unammisara qasujartortoq, taamaammat sukataaginnarpunga, Minik Platou KNR-imut oqarpoq

Inuusuttuaqqani unameqataasoq Taatsiaq Gabrielsen eqitarnermi bronzennappoq.

Tonny Fisker Ilulissaneersoq ullut marluk ingerlaneranni marlunnik kuultinnapppoq. Arctic Sportsimi headpullimi ippassaq kuultinnappoq Aqqaluk Petersen bronzennattoq.

Sisorartut aamma kuultinnapput. Sangusaarnermi Nuunu Chemnitz kuultinnapppoq kiisalu snowboard-ertartoq Søren Andersen aamma banked slalomimi kuultinnalluni.

Nerrivimmi arsaarartartut holdikkaarneranni marlunngornermi finalertoqarmat kalaallit sisamnik  sølvinnapput Yamal kuultinnattoq.

Naatsumut sisoraatinik oqilaniunnermi Aka Olsen bronzennappoq.