Kunngissakkut nunatsinni angalaarfissaat

Kunngissaq Frederik, kunngissap nulia Mary meeraallu sisamat prins Christian, prinsesse Isabella, prins Vincent prinsesse Josefinelu nunatsinni ulluni arfineq pingasuni angalaarnissaat pisortatigoortumik Igalikumi tallimanngorpat aallartissaaq.
juulip 30-at 2014 11:27

Kunngikkormiut umiarsuaat Dannebrog Narsarsuarmi talittarfimmi sapaatiummalli taleqqavoq, sakkutuullu umiarsuaat Triton manna aamma tikissimalerluni.

Kunngikkormiut tikittussaasut Narsarsuarmi malunnarsereerpoq, umiarsuarmummi kunngissakkut sulisui ullumi tikissapput, ilaqutariit tikinnissaannut piareersariartorlutik.

AAMMA ATUARUK Qeqertarsuatsiaani kunngikkormiunik tikeraartoqannginnermi ulapputtut

Kunngissap Frederiup kunngissallu nuliata Maryp siullermeerlutik meeqqatik ilagalugit tikeraassapput, ilimanarporlu taakku ingammik prins Vincent prinsesse Josefinelu tikilluaqquneqalluassasut, marlulissami atiisa ilagaat Minik Ivalolu.

Angalanerup nalaani ullut marluk sulinngiffeqassapput

Angalaneq Igalikumi Narsamilu tallimanngorpat aallartissaaq, taava Alluitsup Paa Nanortalillu arfininngorpat tikeraarneqassapput. Sapaat naallugu kunngikkormiut Qaqortumiissapput, ataasinngorpallu ullup qeqqanut Paamiunut pissallutik.

Marlunngorpat nunaqarfik Qeqertarsuatsiaat siullermeerluni kunngikkormiunit tikinneqassaaq. Tikeraarneq ullup qeqqanut naammassissaaq, taassumalu kingorna ilaqutariit ullut marluk pisortatigoortumik suliassaqaratik namminneq angalaarsinnaallutik.

Kungikkormiut sisamanngorpat aggustip arfineq aappaanniit ulluni marlunni Nuummiissapput, Danmarkimullu arfininngornermi aggustip qulingiluaanni angerlassallutik.