Kunngi Frederiup nuliani dronning Mary, kunngissaq Christian, dronning Margrethe aamma prinsesse Benedikte peqatigalugit kunngitut siullerpaamik atuuffeqarluni sulinini Folketingimi ataasinngornermi aallarnermagu malunnartinneqalaavissorpoq.

Kunngi Frederik ileqquusumik nalunaaruteqarpoq, nalunaarutaalu ministeriunerup Mette Frederiksenip nipituumik atuarpaa.

- Dronning Marylu pisussaaffitsinnik kunngeqarfimmi Danmarkimi tamarmi tamaviaarluta naammassinnittassaagut.

- Suliassatsinnik naalagaaffeqatigiinnut tamanut iluaqutaasumik naammassinnittarumaarluta inunniillu tatigisaassalluta neriuppugut, ministeriunerup kunngip nalunaarutaa Folketingimi nipituumik atuaramiuk oqarpoq.

Folketingimi ilaasortartavut, Aaja Chemnitz (IA) aamma Aki-Matilda (Siumut) politikerini Folketingimeeqataasorpassuarnut ilaapput. Taakku tamatuma kingorna ilassinninniarnermi aamma peqataapput.

Aaja Chemnitz ulloq taanna kalaallisoorlunilu kunnginngorlaamut, nulianut droninginngorlaamut kunngissamullu tunissutissamik aarnualisarpoq.

- Nalliuttorsiorneq una persuarsiutigalugulu malinnaaffigigipput oqaatigisariaqarpoq. Aarnuarlu tunissuterput nunatta, kunnginngorlaap nuliatalu dronninginngorlaap attaveqatigiilluartuarnissaannik qularnaarisussaassaaq, taanna oqarpoq.

Malinnaassagunavittut

Kunnginngorlaaq nulialu dronninginngorlaaq nunarpullu attaveqatigiilluarneruleriaannassasut, Aaja Chemnitzip aamma qularinngilaa – sualummik kunngilu.

- Taamaammat kunnginngorlaaq nulialu dronninginngorlaaq nunatsinni pisunut aamma malinnaassagunavittut nunattalu politikkikkut nammineq aalajangiisinnaassuseqaleriartornera ataqqigaat aamma qularinngilara. Aammali Danmark nunarpullu akerleriissuteqarfeqartarluarlutik suleqatigiilluarnerannut naapeqatigiilluartarnerannullu, taanna oqarpoq.

Aki-Matilda Høegh-Damip kunngikkormiut nunarpullu aamma attaveqatigiilluartuarsinnassangatippai.

- Naalagaaffeqatigiinnut qanoq attaveqateqariaaseqarnermut tunngatillugu kunngip arni tumisiorsimagaa takuneqarsinnaavoq, taamaammat tassuunatigut allanngortoqassangatinngilara, Aki-Matilda Høegh-Dam Siumeersoq oqarpoq.

Kunngikkormiut politikkimut tunngatillugu qanoq isumaqarnersoq aperigatsinni tamanna akiuminaatsikkini, taanna oqarpoq.

- Nunami sorlermiikkaluaraanniluunniit ileqqoqarneq pingaarpoq.

- Kunngikkormiut kunngitut, dronningitut kulturilerinermullu tunngasuni sulissatik naammassilluartarpaat. Kulturi ileqqullu aamma pingaaruteqarput, taanna oqarpoq.

Aki-Matilda Høegh-Dam Folketingimut inortuilluni apuukkami kunngikkormiunut nikuilluni tikilluaqquseqataanngitsoortoq, nutaarsiassaqartitsivik Ritzau allappoq. 

Enhedslistenikkut kunngiitsuunissamik tapersersuisuunertik ersersinniarlugu kunngikkormiut Folketingimiitillugit inortuillutik apuuttarmata kunngikkormiunut nikuilluni tikilluaqquseqataasanngillat.

Siumumeersulli Aki-Matilda Høegh-Damip inortuilluni apuunnera politikkikkut maluginiaqquniarnerunngitsoq, taassuma tusagassiisartua ilisimatitsisoq Sermitsiaq.AG allappoq.

Kunngikkormiut tikeraangajalernerartut

Naalakkersuisut siulittaasuata, Múte B. Egedep (IA), kunngi Frederik illussaarsuarmi Christiansborgimi sapaammi ilasseqatigiissitsinermi kunnginngunngitsiarnerani qanimut aamma naapippaa.

- Tassa immikkuullarissumik misigisaqarfiupput, aamma kunngeqarfiup Danmarkip oqaluttuarisaanerani pisut immikkuullarimmata.

- Kong Frederik oqaluukkuminarpoq, aammalu pissutsinut soqutiginnittoq, malinnaarusuttoq, alakkaamasaqartorlu, Múte B. Egede oqarpoq.

Kunnginngorlaallu nunatsinnut piffissami aggersumi tikeraarnissi takorloorlugu oqamisaarsimasoq tamatumalu ukioq manna pinissaa ilimanartoq, Múte B. Egede aamma oqarpoq.

- Tikeraarnissani taanna, siulliit ilaattut tikeraarnertut ingerlakkumasaminik oqariartuutigivaa, aammalu takorloorlugu piffissami aggersumi tamanna piumaartoq.