Kullorsuarmiut Finn Karlsenip pakatsisikkai
Aalisarnermut akuersissummik qinnuteqarnermi pinngitsoorani umiatsiaaraqarnissamut piumasaqaat Upernaviup nunaqarfiisa avannarlersaanni, Kullorsuarmi, aalisartut piniartullu peqatigiiffiannit sapaatip akunnerani qaangiuttumi avoqqaarineqarpoq.
Avoqqaarineralli aalisarnermut piniarnermullu naalakkersuisumit, Finn Karlsenimit, tusagassiuutitigut oqaaseqarfigineqarumanngikkallarpoq, saaffiginnissut allaffissornikkut maanna suliarineqarmat.
Tamannalu Kullorsuarmi aalisartut piniartullu peqatigiiffianni siulittaasup tulliata pakatsissutigaa:
- Soorunami ajuusaarnarpoq tusagassiuutit atorlugit akerusussimassanngippat. Tassami namminerpiaq aalisarnermut piniarnermullu akisussaasutut tusagassiuutitigut neriorsuisareerpoq aalisarnermut akuersissutinik pissarsinngitsoortut piaartumik sullinneqarlutik tuniorarneqassasut uani ukiumi.
Timothæus Petersen Kullorsuarmi aalisartut piniartullu peqatigiiffianni siulittaasup tullia taama oqarpoq, imalu nangilluni:
- Kisianni paasisagut malillugit immaqa isertorniarsarilerpaat tamakkua tunerusunngisatik. Tusagassiuutit atorlugit neriorsoreersimasatik kingumut taamatut neriorsoqqissagunikkit asuli oqaq atuinnartussaallugu nalunnginnamikku. Ajuusaarnarpoq tamanna, Timothæus Petersen oqarpoq.
Namminersorlutik Oqartussat nalunaarutaat najoqqutaralugu aalisarsinnaanermut akuersissut pissarsiarineqarsinnaavoq qinnuteqartoq ilaatigut aatsaat umiatsiaaraqarpat aalisanermullu atortuuteqarpat. Piumasaqaalli taanna avannaani sikusartumut tulluanngitsoq Kullorsuarmi aalisartut isumaqarput.
Taakkua isumaqarput, sikukkut aalisartarneq, immakkulli aalisarnertut periarfissaasariaqartoq.
- Aammalu aalisarnermut piniarnermullu akisussaasuusup tamakkua pissusiviusut tikillugit oqaloqatigisariaqaraluarpai atuisuusut, Timothæus Petersen oqarpoq, nangillunilu:
- Ukiariartulerpoq. Upernaarli imaluunniit ukioq aallartimmat neriorsuipput upernaaq manna aaqqiiniarlutik. Naak, tamakkua aaqqiissutiginiagaat? Aamma ukioq naangaluttuaannalerpoq suli aaqqiisoqanngitsoq.
