Kujataani imminut toquttorpassuit

Ukioq manna Qaqortumi arfineq-pingasut imminut toqussimapput, taakkunani angutit sisamat, arnallu sisamat. Qaammatillu marluk ingerlanerinnaani sisamat imminut toqunnikkut peerussimapput.

Ukioq kingulleq marluk imminut toqupput.

Qaqortumi ilaqutariinnut sillissivimmi sulisut sooq imminut toquttartut taamak amerleriartigisimanersut paasiuminaatsupppaat akissutissaqartinnagulu.

Imminut toquttarneq ilaatigut tuniluuttarpoq
- Sooq imminut toquttartut taamak amerlatiginersut assut oqaatigiuminaappoq. Apeqquterujussuuvoq, Qaqortumi ilaqutariinnut sullissivimmi aqutsisoq, Cecile Jeremiassen oqarpoq.

Taassuma aamma oqaatigaa imminut toquttarneq ilaatigut tunillaattartoq. Imatut paasillugu imminut toquttoqarsimagaangat, ikinngutaasut ilaqutaasulluunniit qanigisat piffissap ingerlanerani aamma imminut toquttartut.

- Kisianni massakkut paasisinnaanngilarput sooq imminut toqussimasut taamak amerleriartigisimanersut. Taakkumi imminut toquttut arfineq-pingasuusut imminut attuumassuteqanngillat, Cecile Jeremiassen oqarpoq.

Imminut toquttartut amerlanersaat ajornartorsiuteqartuusartut, taassuma oqaatigaa.

- Eqqissereerpoq, massakkut ajunngilaq. Uanga aamma taamaalioruma aamma ajornartorsiutaarutissaanga. Taamatut eqqarsaqqajaaneq imminut toqunnissamut qanittuararsuusarpoq. Ingammik imminut toquttoqarsimagaangat, Cecile oqarpoq.

Ikiuinissaq ajornakusoorpoq, iliuuseqarniarpulli.
Cecile Jeremiassenip oqaatigaa pingaaruteqartoq qimagaasut piaartumik ikiorneqartarnissaat. Kisianni kujataani tarnip pissusaanik ilisimasalik ataasiinnaammat, kujataa tamaat kisimi sullissinnaanngilaa.

Imminulli toquttarneq akiorniarlugu iliuuseqarniarput.

- Katersortarfik attartussavarput, taava innuttaasunik ataatsimiisitsissagut. Taassuma kingorna nunaqarfiit tikissavagut. Innuttaasut suleqatigalugit imminut toquttarneq akiorniarsarissavarput. Aamma atuartut aallarteqqippata atuartunut imminut toquttarneq akiorniarlugu saqqummiiniarpugut, pinaveersaartitsinermut siunnersortit Lars Knudsen oqarpoq.