Kommuneqarfik Sermersooq innuttaasunik ataatsimiigiaqqusivoq
Naalakkersuisut naligiissaarineq pillugu iluarsaasseqqinniarneranni Kommuneqarfik Sermersooq aningaasarpassuarnik annaasaqassaaq, iluarsaasseqqinniarnerlu sulisunut tunngasunik maannamullu siunnersuut kommunimut qanoq kinguneqassanersoq innuttaasunik ataatsimiisitsinermi ilisimatitsissutigineqassaaq.
- Aningaasaqarnikkut naligiissaarineq kommunimut imaannaanngitsuuvoq, taamaammat innuttaasut suliamut peqataatinniartariaqarpavut. 56 millionit koruunit annaassagutsigit kikkunnut tamanut malunnaateqassaaq, Kommuneqarfik Sermersuup borgmesteria Asii Chemnitz Narup tusagassiuutinut nalunaarummi ilaatigut allappoq.
Innuttaasunik ataatsimiisitsinerit illoqarfinni tamani piffissaq eqqorlugu ataatsikkut ingerlanneqartassapput. Nuummi, Paamiuni, Tasiilamilu pingasunngorneq aggustip ulluisa arfernganni unnukkut nalunaaqutaq arfineq-marlunut innuttaasunut katersortarfinni ataatsimiittoqassaaq, Illoqqortoormiunili Ejnar Mikkelsenip atuarfiani ataatsimiisitsisoqassalluni.
