Kommunalbestyrelsimi ilaasortaq: Nalimmassaariaaseq nutaanngitsoq atortariaqarparput

Nalimmassaariaatsip nutaap Kommuneqarfik Sermersuup aningaasaqarniarneranut annertuumik eqquisussaammat, nalimmassaariaaseq nutaanngitsoq atorallartariaqartoq, kommunalbestyrelsemi ilaasortap, siumumeersup, Peter Davidsennip siunnersuutigaa.
Allattoq Dorthea Johansen
juulip 28-at 2014 12:04

Taamak siunnersuuteqarpoq naatsorsuuserisut nalimmassaariaaseq tutsuiginanngitsumik nalilermassuk.

- Nalunngilarput Kommuneqarfik Sermersuup ingerlatsinermut aningaasartutai qaffakkaluttuinnartut, Kommuneqarfik Sermersuup innukkiartornera pissutaalluni. Nutsertut amerlanermik.

- Taamaakkaluartoq isertitagut annertusiartoratik taamaaginnarput. Taamaammat ernumanartoqartipparput taamak annertugisumik Kommuneqarfik Sermersooq nalimmassaanermut pilliuteqassappat, Peter Davidsen, Kommuneqarfik Sermersuumi kommunalbestyrelsimi ilaasortaasoq oqarpoq.

AAMMA ATUARUK ATAATSIMUT ISIGALUGU Nalimmassaarinermik iluarsartuusseqqinnissaq ima oqaaseqarfigineqarpoq

Kommuneqarfik Sermersuumut inuit nuuttartut amerliartorput, saniatigullu nunaqarfiit isorliunerusullu sullinneqartussaapput. Aningaasallu isertitat amerliartornatik taamaaginnarput. Aningaasat 56 millionit nalimmassaanermut Kommuneqarfik Sermersuup pilliutigissagai siunniunnersuutigineqarpoq.

Tamanna Kommuneqarfik Sermersuumi kommunalbestyrelsimi ilaasortat tamarmik nalimmassaanissaq nutaaq akerlerigaat, Peter Davidsenip oqaatigaa. Taassuma kissaatigaa nalimmassaariaaseq nutaanngitsoq atorneqarallartariaqarnissaa.

- Pingaaruteqartorujussuuvoq eqqaamassallugu Kommuneqarfik Sermersooq aamma nunaqarfeqarpoq aamma isorliunerusoqarpoq. Taakkununngalu sullissinissamut aningaasarpassuit atorneqartussaapput.

- Sanngiinnerusortagut eqqussanngikkutsigit isumaqarpunga nalimmassaaneq nutaanngitsoq atorneqartariaqarallartoq, uuma nalimmassaariaatsip nutaap tutsuiginartumik inissinnissaata tungaanut. Maannakkummi nalunngilarput tutsuiginanngilluinnartumik naatsorsuuserisut nalunaarutigereeraat. Peter Davidsen oqarpoq.

Augustip 11-ani nalimmassaarinissaq pillugu ataatsimiittoqassaaq, aalajangiisoqarlunilu.

Peter Davidsenip neriuutigaa nalimmassaanissaq nutaaq 11. august nallilertinnagu torersumik tunngavissaqarluartumillu nalilersorneqarumaartoq.