Inatsisartut ilaqutareeqarnermut peqqissutsimullu ataatsimiititaliaata Nuuk Outdoorimut suliaq paasiniaaffiginialerpaa. Kommuneqarfik Sermersuup meeqqat angerlarsimaffiup avataanut inissinneqartut takornarialerisumit nakkutigitittarai KNR-ip saqqummiutereerpaa.

Ilaatigut Siumumit ataatsimiititaliamut ilaasortaq Doris J. Jensen taama paasissutissiivoq:

- Taanna suliaq oqartussat tamaasa qanimut attaveqarfigalugit maanna sammisorujussuuarput. Ataatsimiititaliamit ernumassutigaarput. Maanna pisut akuerisunnaanngilagut, Doris J. Jensen oqarpoq.

Ataatsimiititaliap suliaq jannuaarip ulluisa pingajuanni ataatsimiissutigaa. KNR-illu paasisai naapertorlugit, naalakkersuisoq Aqqaluaq B. Egedep suliamut atatillugu siunersiuinissamut aggersarneqarnissaa ataatsimiinnermi aalajangerpaat. Naalakkersuisup suliamut ilisimasani ullumi nalunaaqutaq ataatsimut qiteqquppat nassuiassavai.

Ilaqutareeqarnermut peqqissutsimut atatsimiititaliap suliaq aamma kukkunersiuinermut ataatsimiititaliamut misissortinniaraa, Doris J. Jensen oqarpoq.

- Inatsisimmi malittussaapput. Suliaq sukumiisumik misissorneqartariaqartoq isumaqarpunga. Taamaammat Inatsisartut kukkunersiuinermut ataatsimiititaliaata suliamik misissuinissaanik qinnuteqarpunga.

Demokraatit: Suliaq ilungersunarluinnarpoq

Aamma Demokraatinit ataatsimiititaliamut ilaasortap, Bjørk Lange Olsenip, Nuuk Outdoorimut suliaq misissorluarneqartariaqarsoraa.

- Suliaq ilungersunarluinnarpoq, inuiaqatigiinnilu meeqqat angerlarsimaffiup avataanut inissinneqartartut pitsaasumut inissinneqarnissaata ajornakusoornerata ajornartorsiutaasorujussuuneranut ersiutaalluni, Bjørk Lange Olsen oqarpoq, nangillunilu.

- Meeqqat suliniutinut taaneqartartunut nakkutilliisoqanngitsunut inissinnissaat pinaveersaartinneqartarsiaqarpoq. Meeqqanut angerlarsimaffiup avataanut inissiisarfinni soorunami nakkutilliisoqartuaannartariaqarpoq, Bjørk Lange Olsen oqarpoq.

Oqaaseqartartut tarmik kommunip Nuuk Outdoor pillugu ajornartorsiutit aasarli ilisimasimagai, meeqqallu aatsaat decembarimi KNR-ip allaaserinninnerata kingorna angerlartissimagai ilungersunarluinnartuusoraat:

- Kommunip tungaaniit akuerineqarsimasoq isornarluinnartuusoraara. Naak qaammatini arlalinni ilisimaneqaraluartoq iliuuseqartoqarsimanngilaq. Aatsaallu tamanut ammasumik isornartorsiuisoqalereermat ukkatarinninnerlu annertusimammat iliuuseqartoqarluni, Doris J. Jensen oqarpoq.

Bjørk Lange Olsenillu taperserpaa:

- Tamanna naggaterpiaani kommunip aamma borgmesterip, Avaaraq Olsenip akisussaaffigaat. Ajornartorsiutit taama sivisutigisumi ilisimasimagunigit aaqqiissuteqarniarnera taama sivisutigisimammat eqqarsarnartoqarsinnaavoq. Tamanna soorunami siullertut meeqqanut . uggornarpoq.

Borgmesterip ataatsimeeqatiginissaa

KNR-ip paasissutissarsiarisai naapertorlugit borgmesterip Avaaraq Olsenip ataatsimiititaliaq sisamanngorpat ataatsimeeqatigissavaa, kisianni siullertut Aqqaluaq B. Egede meeqqat takornarialerisut suliffeqarfiannut pinasuartumik inissinneqarsimasut pillugit suliamut ullumi nassuiaateqassaaq.

Akisussaaffik sumiikkaluarpalluunniit, nunatsinni meeqqat angerlarsimaffiup avataanut inissinneqartartut atugaat pitsaanerulersinniarlugit malittarisassat aaqqissorneqartariaqartut Doris J. Jensen isumaqarpoq:

- Namminersorlutik Oqartussat, kommunip imaluunniit namminersortup pigisaata akisussaaffigineraa apeqqutaatinnagu meeqqat inuusuttullu pillugit nakkutiginninnermut pikkorinnerulissaagut, Doris Jensen oqarpoq.

Aamma Inatsisartunut ilaasortat imminnut qiviartariaqartut peqqissaartunillu malittarisassaliornissamut qanoq iliuuseqartoqarnissaa misissortariaqaraat Bjørk Lange Olsen isumaqarpoq.00:03:35

- Suliniutitut taasaqarluni ulloq unnuarlu paaqqinnittarfittut atuutsitsisinnaasoqarpat, malittarisassat amigaateqarput. Nuuk Outsoorimimi taamaattoqarpoq, nakkutilliisoqarnani. Taamaattoqaqqernissaata pinaveersaartinnissaanut qanoq iliorsinnaanerluta paasiniassavarput, Bjørk Lange Olsen oqarpoq.