Qineqqusaarutip KNR TV-ikkut saqqummiunneqarnera KNR-imit ajuusaarutigineqarpoq
KNR upperisanut partiinullu aalajangersimasunut nittarsaassissuguni inatsisinik unioqqutitsissaaq.
Taamatullu pisoqarpoq IA sinnerlugu folketingemut qinigassanngortittup Aaja Chemnitz Larsenip qineqqusaarutaa KNR TV-ikkut ippassaq saqqummiunneqarmat.
Inuttut kukkusoqarsimavoq maleruaqqusallu siunissami sukaterneqassasut KNR-imi pisortaq neriorsuivoq.
- Ajoraluartumik KNR-imi kukkusoqarsimavoq - inuttut kukkuneq pissutigalugu tamanna pisimavoq, KNR-imi pisortaq Jacob Abelsen taama oqarpoq.
Partiit siulittaasuisa naggataarutaasumik oqallitsinneqarnerat ippassaq ingerlanneqartoq sioqqullugu, KNR TV-imi pilerisaarutit saqqummiunneqarneranni, IA-p folketingemut qinigassanngortitaata Aaja Chemnitz Larsenip qineqqusaarutaa saqqummiunneqarpoq.
Aamma atuaruk Knr.gl-imi pilerisaarutit peerneqarput
Tamanna inatsisinik unioqqutitsineruvoq.
KNR Radio aamma TV partiinik aalajangersimasunik nittarsaassisussaanngilaq.
KNR-ip siunertarinngilluinnarpaa partiinik aalajangersimasunik salliutitsissalluni, illuinnaasiortumik ingerlatsineq KNR-imi siunertarineqanngimmat Jacob Abelsen oqarpoq.
- Isumaqarpunga tassani naqissuserusullugu KNR qaqugumulluunniit partiinik illersugaqassanngimmat aamma tamassuma siunissami malinneqarnissaa pingaartissagatsigu, Jacob Abelsen oqarpoq.
KNR TV-imi pilerisaarutinik saqqummiussisarnermi maleruagassat sukaterneqassasut KNR-imi pisortaq neriorsuivoq.
- Siunissami tamassuma pinngitsoortinnissaa naatsorsuutigaara, inatsisit maleruagassallu KNR-imi sukaterneqassapput, KNR-imi pisortaq Jacob Abelsen oqarpoq.