KNAPK: Qaleralittanik amerlisaanissaq akisussaassuseqanngitsuliorneruvoq

Qaleralittassanik amerlisaaniarneq akisussaassuseqanngitsuliorneruvoq. Siumup politikkikkut oqaaseqartartuata Karl Kristian Krusep siunnersuutaanut KNAPK qisuariarnera taama erseqqitsigaaq.

KNAPK-p siulittaasuata, Henrik Sandgreenip, siunnersuut qaleraleqassutsimut ernumanartutut akigissaartitsinermullu ulorianartutut taavaa.

- Imaannaanngitsuuvoq. Maannakkut pisassiissutigineqartartut 30 procentii, imaluunniit taanna sinnilaarlugu, qaangersimaneqareerput. Taavalu aamma taakkua qaavatigut suli annertunerusumik qaangiisoqaqqissappat, tamanna aalisarnermik ingerlatsinermik akisussaassuseqanngitsuliornerussaaq, Henrik Sandgreen oqarpoq.

Siumup politikkikkut oqaaseqartartuata Karl Kristian Krusep qaleqaleqasusseq ernumartoqartinngilaa, pinngortitaq imminut paarisuusoq Radioaviisimut oqarluni. Tamannali KNAPK-p siulittaasuata, Henrik Sandgreenip, isumaqatigeqqajanngilaa.

- Unalu massakkut periarneq namminermini Kattuffiup isaanit isigalugu torrallataanngitsutut isigisariaqarpoq.

Qaleralittat amerlineqarpata, tunisinermi akit apparnissaat, siulittaasup aarleqqutigaa, aperaarlu: qaleraliit 25.000 tonsit qaqinneqarpata, taava susoqassava?

- Qalerallip nalingata, aamma ullutsinni akigissaarteqalugu tunisartakkata, oqaluttuaannanngornissaa, tamatumalu kingunerisaanik imaassinnaavoq ukiuni arlalissuarni sulissutigisariaqalissagipput aarleqqutigaarput.

Henrik Sandgreenilli aamma tikkuarpaa, ingerlariaqqinnissamut periarfissarpassuaqartoq, ataqatigiissarneqarsinnaasunik, oqarlunili siunnersuut pitsaasuunngitsoq. Pinngortitaq pillugu suliniaqatigiiffissuup Verdensnaturfondip ulorianartorsiortunut allattugaataanut aappaluttumut qalerallit nalunaarsoneqarnissaat pinaveersaartinniarlugu Nunarput mianersortariaqarpoq - qalerallimmi ilumut ajungitsumik pinerivut nakkutigigereerpaat.

- Soorunami qaleralittassat taakkua killilersugaareersut, taakkuinnaviit sammineqarmata aamma amigarsisoqartarpoq, taavalu aamma aningaasarsiutaalluarmata, pilerngunneqarluartarlutik. Taamaammat aamma taamaattoqartillugu pinngitsoorneqarsinnaanngilaq sukangalaartumik aqutsisinnaaneq, KNAPK-p siulittaasua Henrik Sandgreen oqarpoq.