KNAPK: Imminnut ataqatigiinngillat
- Maannakkut pisut imminnut ataqatigiinngilluinnaqqissaarput. Eqqarsaatigilluagaanngilaq. Naalakkersuisooqatigiit suniarnersut paasisariaqalerparput, taamaattumik aalisarnermut politikki saqqummiuttariaqalerpaat, Henrik Sandgreen KNR-imut oqarpoq.
Naalakkersuisut siunnersuutaat malillugu avataasiorlutik raajanik, qaleralinnik avaleraasartuunillu aalisartut siunissami kisimik akileraarusersorneqarunnaassapput.
Aalisakkat suulluunnit qaqinneqartartut tamarmik inuiaqatigiinnut iluaqutissanngortinniarneqarput, tassanilu avataasiorluni sinerissamilu qanittumi aalisarnikkut qaqinneqartartut tamarmik assigiimmik pineqalernissaat eqqarsaataavoq. Aalisakkat suulluunnit, soorlu saarulliit, suluppaakkat nipisaallu qaqinneqartut amerlappata akileraaruserneqartalissapput.
Allannguutit taakkuinnaanavianngillat. Ukiut siuliini aalisarnermut ineriartortitsinermut immikkoortitsisoqartaraluarpoq, assersuutigalugu ukioq manna 20 million koruunit immikkoortinneqarsimapput, aappaaguli aningaasaliisoqassanngilaq.
Aningaasanik pisariaqartitsisoqalersorlu aalisarneq aallerfigineqartuaannarsinnaanngitsoq siunissamilu aaqqiissutissamik atorsinnaasumik aaqqiisoqartariaqalersoq siulittaasoq isumaqarpoq.
- Nunatsinni aningaasameernerup nalaani naleqanerulersitsissalluta eqqartuiuannguarluta atortussarpiavut aningaasat peerneqarneri anguniakkanut naapertuutinngilluinnaqqissaarpoq.
