Kinami biilit manngertornisut Nunatta aningaasaqarniarneranut pingaaruteqarput

Avaleraasartuut qalutsinnik nigorterineranni, aammalu aatsitassarsioqatigiiffiit uuliasioqatigiiffiillu tunuartitilernerini, zinki nunatta aningaasaqarneranut siunissami iluaqutaallualersinnaagunarpoq.
Ford
Ford Assi © : Dan Tantrum/Flickr Commons
Allattoq Mads Lynge
aggustip 20-at 2014 09:12

Australiamiut aatsitassarsiutileqatigiiffianni Ironbark Zincimi pisortaq Jonathan Downes taama isumaqarpoq:

Zinkip nunarsuarmi niuffaffinni akia ukiup affaata kingulliup ingerlanerani 15 procentinik akitsorsimavoq, Kalaallit Nunaatalu tamanna iluaqutigisinnaavaa. Australiamiut aatsitassarsioqatigiiffianni Ironbark Zincimi pisortaq Jonathan Downes, aviisimut Politikenimut ullumi taama oqarpoq.

Ironbark Zinc, Tunup Avannaarsuani Citronenfjordimi zinkimik piiaavissamik pilersitserusuppoq.

Aatsitassat savimineq, kanngussak uranilu Nunatsinni nassaassaalluarput, taakkuali ukiuni kingullerni akikilliartuinnavissimapput, zinkilli akitsoriartuinnavissimalluni. Nunattalu tamanna iluaqutigilluarsinnaavaa, Jonathan Downes oqarpoq.

Zink sanaartornermi atorneqartarpoq, pingaartumillu biililiornermut atorneqartarluni. Tassami biilit manngertornertussaannginnerat anguniarlugu savimineq zinkimik akuneqartarpoq. Kinami aningaasarsiorneq siuariartupiloortorujussuuvoq, nunallu biilinik pisisartut annersarilersimallugu. Zinki nunarsuarmi niuerutigineqartup affaa Kinap maanna pisiarisalersimavaa, Jonathan Downes oqarpoq:

AAMMA ATUARUK "Citronen" kinamiut suliffeqarfiannik isumaqatigiissuteqarpoq

- Kinami biilit amerlanerpaamik 20 procentii manngertornertussaanngitsutut suliarineqarsimapput, taamaammat zinkimik tunisassiornissamut periarfissat annertupput. Kinami sanaartornerup maanna inissisimanera aamma periarfissiilluarpoq, tassami zinki nunani killerni sanaartornermi atorneqartupilussuuvoq, Kinamilu sanaartornermi zinki atorneqartoq 25 procentiinnaalluni, Kinamilu aningaasarsiorneq siuariartuinnassappat zinkimik atuineq annertusiartuinnassaaq, Ironbark Zincip pisortaa Jonathan Downes oqarpoq.

Jonathan Downesip neriuutigaa Ironbark Zinc, Tunup avannaarsuani Citronenfjordimi zinkimik piiaveqalersinnaanissamut qinnuteqaataa Nunatsinni oqartussanit akuersissutigineqarsinnaasoq.

Kinamiut Ironbark Zincimik aningaasaleeqataasut taama aamma neriuuteqarput. Pilersaarutit iluatissappata zinkimik 2017-imi piiasoqalersinnaanissaa neriuutigineqartoq, Jonathan Downesip Politikenimut oqaatigaa.