Aalisarnermut inatsisissaq akuerineqanngippat Kim Kielsenip (Siumut) aalisarnermut piniarnermullu naalakkersuisuujunnaarniarnerminik oqarnera iliuusissaarunnermik takutitsivoq.   

KNR-ip politikkikkut naliliisartua, Ineqi Kielsen, taama isumaqarpoq.

- Kim Kielsenip inuttut massakkut politikkikkut nukini atulerpai. Tassa oqariartuutigalugu una iluatsinngikkuniuk, taava nammineq naalakkersuisutut issiaannarniarnani.

- Naalakkersuisoqatigiit ilalinngippassuk aamma naatsorsuutigisinnaavarput naalakkersuisoqatigiinni ilalersuineq killeqartorujussuanngortussaassasoq, Ineqi Kielsen oqarpoq.

Ineqi Kielsen politikkikkut naliliisartuuvoq. Taanna Siumut sinnerlugu Inatsisartunut ilaasortaareerpoq aamma Inatsit Tunngaviusussaq Pillugu Isumalioqatigiissitami siulittaasooreerluni maanna parteerisimasaminik anereerpoq.

Sunniiniarsarineq

Inatsisissaq akuersissutigineqanngippat, Kim Kielsen naalakkersuisutut pinngitsoorani tunuarniarniarnerminik uani sapaatit-akunnerani oqaaseqarpoq.

- Taava sullarlussimavunga, taanna KNR-imit apersorneqarnermini taama tunngavilersuivoq.

Taamaattoqassappallu siullermik taama pisoqarnavianngilaq. Aalisarnermummi naalakkersuisuusartut ukiut 14-it ingerlaneranni inuit assigiinngitsut aqqanillit naalakkersuisuujunnaartareerput.

Kim Kielsenip naalakkersuisuunerminik taamatut aalajangiivigisassanngortitsinera politikkikkut allatut iliuusissaarunnerusoq, Ineqi Kielsen isumaqarpoq.

- Taamaattumik naalakkersuisoqatigiit aalisarnermut inatsisissatut siunnersuut akuersissutiginngippassuk, taava kingunerisinnaavaa naatsumik oqaatigalugu Inatsisartunut qinersineq.

Aalisarnermut inatsisissatut siunnersuut Inatsisartut apriilip aqqarnani siullermeerlutik oqaluuseraat, aalisartullu kamassimasut akerliussutsimik takutitsereeersut Inatsisartullu ataatsimiittarfianni oqallittoqangaatsiareersorlu, inatsisissatut siunnersuut Aalisarnermut, Piniarnermut Nunalerinermullu Ataatsimiititaliamut ingerlateqqinneqarpoq.  

Aalisarnermut inatsisissaq pilersaarutaasutut ataatsimiititaliami maajip arfineq-pingajuata tungaanut oqallisigineqareerpat ataatsimut oqaluuserineqaqqissaaq.  

Inatsisissallu taamatut isikkoqarluni akuerineqarnissaa anguniarlugu Kim Kielsenip tapersersortini qularunnaarsinniarlugit ilungersungaatsialissagunartoq, Ineqi Kielsen naliliivoq:

- Kim Kielsen massakkut periarfissanik allanik peqarpiarunnaarnermini inuttut attaveqaatini atulerpai, oqarluni nammineq inissisimaffik taanna inissisimaffigiinnarniarnagu tunulequtserneqanngikkuni.

Politikeri misilittagartooq

Kim Kielsenilli attaveqaatigissaarnerminik aamma nammineq ilisimannilluarneranik takutitsivoq.

- Kim Kielsen qinersinermi kingullermi siulittaasorisaminiit amerlanernit inuttut taaguunneqarnikuuvoq, Ineqi Kielsen nassuiaavoq.  

Naak Kim Kielsenip maanna inissisimanerani naliliinermi “allatut periarfissaarunneq” arlaleriarluni oqaatigineqaraluartoq, taassuma politikeritut misilittagartunera eqqaamaneqartariaqarpoq.

Taamaammallu periuseriniakkaminik avammut oqaatigisami saniatigut allatut pilersaaruteqarsinnaasoq, Ineqi Kielsenip erseqqissarpaa:  

- Kim Kielsen arlalinnik periarfissarsiortuaannarpoq. Tamaasalu saqqummiutinngisaannarpai.