Kenneth Høegh Visit Greenlandimi siulittaasunngorpoq

Piginnittut, tassalu Namminersorlutik Oqartussat piumasaat suliffeqarfimmilu suliarineqarsinnaasut naapertorlugit suliassat ingerlanneqarumaartut, siulittaasunngorlaaq Kenneth Høegh erseqqissaavoq.
 
- Suliassat piginnittullu piumasaat malillugit ingerlatsisinnaanissarput neriuutigaarput, neriuppungalu suliassat naammassineqarnissaat pillugu naammattumik aningaasaliiffigineqarumaartoq, Kenneth Høegh oqarpoq.
 
Kenneth Høegh siulittaasunngunnginnermini siulersuisuni siornali ilaasortaareerpoq, nunatsinni nunanilu allani inuussutissarsiutit siuarsarnissaannik ukiuni 20-ni misilittagaqarpoq.  Kenneth Høeghip siulitatasutut taarserpaa Karin Kleist Egede.
 
Siulersuisuni ilaasortanngortut allat tassaapput Sakiko Daorana, Karin Elisabeth Sinclair Strøm aamma Johanne Margrethe Bech. Taakku saniatigut Salik Hard siulersuisuni ilaasortatut ingerlaqqippoq.
 
Ileqquusumik ataatsimeersuarnermi piginnittut sinnerlugit Naalakkersuisut siulittaasuat Aleqa Hammond peqataavoq. Siulittaasumik taarsiineq pillugu ima oqarpoq:
 
- Siulersuisut taarserneqartarnera nutaajunngilaq, ataatsimeersuarnerni tamanna periarfissaajuaannartarpoq. Siulittaasumik nutaamik toqqaanerput pikkorlunnermik oqariartornerunngimmat erseqqissaatigissavara, nunarpulli inoqarpoq pikkorissorpassuarnik taakkulu atorluarusullugit allat periarfissikkusuppavut.