Katuap Ole Kristiansen nalliuttorsiutigaa
Tassami nipilersortartup taamanikkut ilisimaneqanngitsup nuuteeraq kingorna nuannarineqaleqisoq saqqummersippaa.
"Isimiit iikkamut", nuuteeraq ateqarpoq, nipilersoriaaseq nutaaq, taalliallu nuannersut, inuit ilaatigut immaqa sungiussimanngisaat saqqummersinneqarlutik.
Misigissutsit, paatsiveerunneq, sinnattullu pillugit Ole Kristiansen erinarsorpoq, nuuteeqqallu saqqummersinneqarnerata kingorna erinnat ilaannut videoliortoqarpoq, tassa "Zoo inuillu" videoliarineqarami, erinniaq taalliarlu ilaatigut aalassatsitsisoq. Tassami Nuuk uumasuusivissuarmut videoliami tassani assingutinneqarami.
Nipilersortartoq maanna 49-nik ukiulik nipilersoqatinilu Katuami unnugu tusarnaartitsissapput, saqqummersitseqqaarnerup ukiunik 25-nngortorsiornera ilaatigut nalliussineqassalluni.
Ole Kristiansen, nuuteeqqanik arlalinnik kingorna saqqummersitseqqinnikuuvoq, aamma nuannarineqaqisunik.
Ole Kristiansenip saqqummersitseqqaarnerminit ukiunik 25-nngortorsiornerani tusarnaariartoqarniaruni, taava Katuamut unnugu nalunaaqutaq qulinut orniguttoqarsinnaassaaq.
