Karla Jessen Williamson: suliassaq pingaartoq

-Ajornartorsiutivut akueralugit ingerlariaqqittariaqarpugut, Karla Jessen Williamson KNR-imut oqarpoq, saammaasseqatigiinissarlu nunat allat ingerlannikuugaat tikkuarlugu.

Canadami, najugaqarfigisaani, saammaasseqatigiinnissamut ilumoortussamillu ujartuinermut ataatsimiitsitaliaqarnikuuvoq.

Tassani nunat inoqqaavisa nunasiaataanermi qanoq atugaarsimanerannik nunasiataanerullu kingorna inuunerat qanoq allanngorsimanersoq misissorneqarpoq. Taassumunnga assingusumik Sydafrikami aamma suliaqartoqareerpoq.

Taamaaliornikkut nunasiaataasimanerup inuiaqatigiinnut qanoq kinguneqartarnera, qanorlu ingerlariaqqittoqarsinannersoq ersarissarniarneqarpoq.
 

- Canada Sydafrikkallu tassa siuttuupput tamatuma tungaatigut.

- Tassa nunasiaataanerup kingunerisaanik akuerinninnissat suuneri pillugit. Taamaattumik isumalioqatigiititani taanna anguniagarissagaat naatsoersuutigilluarsinnaavara, Karla Jessen Williamson oqarpoq.

Taassuma ajornartorsiutit qiviarsinnaalertariaqarivut oqaatigaa.

Indiami Afrikkamilu nunat amerlasuut nunasiaataasimanermi ajornartorsiutit assingusut aqqusaarsimagaat, aamma oqaluttuarpoq. Ajornartorsiutillu assigiinngiiaartumik aaqqinniarneqartarsimapput.

Ajornartorsiutit ersarissarlugit

Karla Jessen Williamsonip India 40-kkunni namminersulivissimasoq maannalu ingerlariaqqissimarpasittoqaamma oqaatigaa.

- Afrikami naalagaaffiit takussagutsigit nunasiaataanermik kingornatigut namminersulersut imminut artukkertutut soorlu ingerlasut. Tassanilu pissutaavoq iluminni eqqissiviilliorneq atoramikku.

- Taamaattumik misissuinissaq isumasioqatigiinissarlu - saammaasseqatigiinneq - pingaartorujussuupput, siunissami ajornartorsiutit nassuerutiginissaaat anguniassagutsigu, Karla Jessen Williamson oqarpoq.

Saammaaseqatigiinnissamut isumalioqatigiititat aggustsimik siullermik naapissapput.