KANUNUPE-p siulittaasua toquvoq

Kalaallit Nunaanni Nunaqarfiit Peqatigiiffiisa KANUNUPE-p siulittaasuat Karl Petersen 56-inik ukioqarluni toquvoq. Regine Bidstrup, KANUNUPE-mi allatsi KANUNUPE sinnerlugu taama nalunaaruteqarpoq.

Karl Petersen pingasunngornerup sisamanngornerullu akornanni unnuakkut toquvoq.

Karl Petersen Naajaat, Innaarsuit Aappilattorlu sinnerlugit nunaqarfinni aqutsisutut qinigaavoq, KANUNUPE-milu 2022-mi siulittaasunngorlluni.

- Inoqatiminut asannittoq, tamanut inissaqartitsisoq, ikinngutaalluartoq, unneqqarissumik ingerlatsisoqarnissaanik pingaartitsisoq Karl Petersen, KANUNUPE-mi nunaqarfimmiunullu tunniusimalluarluni sullissilluartoq annaavarput. Regine N. Bidstrup, KANUNUPE sinnerlugu Karl Petersenimut eqqaaniaalluni ilaatigut allappoq.

Karl Petersen Nukissiorfinni ukiorpassuarni sulivoq, nunaqarfinnilu aqutsisuni ukiuni arlalinni sulilluni.

- Kaalip nunaqarfimmi aqutsisut iluanni innuttaasunut qinikkallu pitsaasumik sullinneqarnissaat pingaartitaraa. Suliassat suugaluarpataluunniit unneqqarissumik sullissineq pingaartilluinnarlugu suliap suliarineqarnissaanik qulakkeerinninniartarnini ilisarnaatigaa, Regine N. Bidstrup allappoq.

Karl Petersenip nuliani meeqqanilu pingasut, ernutallu tallimat qimatarai.