Kangia Qiterlermi illoqarfissuarmi Dubaimi siallingaatsiartoq

Kangia Qiterlermi nunami De Forenede Arabiske Emiraterini ulluni kingullerni siallingaatsiarpoq, illoqarfiillu arlallit qarsutsinersuaqarfiullutik.

Nunami tassani siallingaatsiarnera pissutaalluni inuk ataaseq ajunaarsimavoq, ajunaartullu amerlanerusinnaallutik. Aqquserngit qarsutsiffiupput silaannakkullu angallanneq eqqorneqarluni.

Nutaarsiassaqartitsivk Reuters taama allappoq.

Timmisartut mittarfimmi qarsutsinersuaqarfikkoortut Dubaimi timmisartoqarfissuarmi videokkut assilisat takutippaat.

Mittarfiup nalaani marlunngornermi akunnerit aqqaneq-marluinnaat ingerlaneranni 100 millimeterinik siallerpoq.

Tassa marlunngornermi taama siallertiginerata assigaa, Dubaimi ukiup ataatsip ingerlanerani siallertarneranut. Naalagaaffiit Peqatigiit paasissutissaataasa tamanna takutippaa.

Angut 70-inik ukiulik ajunaartoq

Ima siallertigaaq biilertut biilitik ilaatigut qimaannartariaqartarsimallugit, imermi sukkasuumik qaffakkiartorpoq, aqquserngit qarsutsinersuaqarfiulerlutik.

Sumiiffinni allani aamma siallingaatsiarpoq. Illoqarfimmi Al Ainimi akunnerit 24-unngitsuulluunniit ingerlaneranni 254 millimeterinik siallerluni.

De Forenede Arabiske Emiraterini silasiortut taama ilisimatitsisut, nutaarsiassaqartitsivik Reuters allappoq.

Illoqarfimmi Ras Al-Khaimahmi angut 70-inik ukiulik biilii kuugussaammata ajunaarpoq.

Tamaani politiit taama iilsimatitsisut, nutaarsiassaqartitsivik AFP allappoq.

Naallu marlunngornermi ullup naalernerani siallerpallaarunnaariartulaaraluartoq pingasunngornermi ullaap tungaani suli ajornartorsiortoqarpoq.