Kangersuatsiami nunamiit aalarpoq
Upernaviup nunaqarfiani Kangersuatsiami, sumiiffinni assigiinngitsuni pingasuni nunamiit qaqortumik pujoqartumik, kissartumik aniasoqarpoq. Tamannalu nunaqarfimmiut siornatigut misiginikuusimanngilaat.
- Takorlooriaruk cigaritsi milluteriarlugu sakkortuumik silammoorlugu pujortitsisoq, tassa taamak ersaritsigisumik quppatigut pujortoqarpoq, Wilhelm Christiansen KNR-mut taama oqarpoq.
Pujortut tallimanngormat aallartittut maanna pujoorunnaarsimapput, qummulli pujoortut imaluunniit aalartut ima kissartigisimapput allaat, ujaqqat ataanni ivikkat qorsooqqissisimallutik.
Quppat qaavanut pilluni kissassusaat maluginiarneqarsimavoq soorlugooq tassa kiassaat sakkortunerpaaffissaanut ilillugu saniani nikorfalluni. Taama misigisaqarput naak Kangersuatsiami 21-it ataallugit issikkaluartoq. Kissarli kisiat maluginiagassaanngilaq, taakku saniatigut nunasunni sakkortooq naamaneqarsinnaavoq, Wiiliap oqarneratut soorlu tassa aasarissukkut nunasunni naamallugu.
Wilhelm Christiansenip oqaatigaa taakku aniatitsisut pingasut imminnut ungasinngitsumik inissisimasuusut. Immamiillu meterinik 50-nik qatsitsigisumi inissisimasut.