Kangerlussuaq inunnik ulluni tulliuttuni ulikkaassasoq
Silaannakkut angallassinerup sila teknikkikkulluunniit ajutoorneq pissutigalugu taamaatiinnarneqartarnera Kangerlussuarmi akunnittarfiup aatsaat misiginngilaa. Sisamanngornermi angalasussat qanoq amerlatigisut unnuisussaaneri ataqatigiissaartariaqarpaat.
Ilaasussat 250-it sisamanngornermi ualikkut inissarsineqareersimapput, taakkualu nalunaaquttap akunneri ullullu ingerlaneranni amerleriaqqissinnaapput.
Tamatumuunalu unnuisussat immikkut unammillernarnerusut saaffiginnittarfiup pisortarigallagaata, Uuka Storch-Nielsenip oqaatigaa.
- Tallimanngorpat timmisartoq Hercules Airlift Wingimiit (amerikamiut silaannakkut nakkutilliisui aaqq.) 100-init amerlanerusunik ilaasoqarluni tikissaaq, taakku Hotel Umimmak illulu 664 inniminneqqavaat. Taamaammat Danmarkimiit timmisartoq aqagu tikissappat taava ajornartorsiuteqalersinnaavugut, Uuka Storch-Nielsen oqarpoq.
Uuka Storch-Nielsenilli oqaatigaa suleqatinilu unammillernartup aaqqiissuteqarfiginissaanut piareersimallutik.
- Eqaarsaartarfeqarpugut, siniffinnik patitikkattanik ilioraasinnaavugut, aamma unnuisarfeqarpoq. Taakku naammanngippata amerikamiut inikillisaarsinnaanersut aperisinnaavagut, taamaalilluta angalasut taakkununnga inississinnaassallutigit.
Air Greenland naapertorlugu kinguaattoornerit kitaata sinriaani silarluneranik peqquteqarput. Arfininngorpat aatsaat silaqqississarpasippoq. Timmisartuutileqatigiiffiup ilaasussat 900-it tikillugit angalanissat taamaatiinnarneqarnerinik eqqugaasinnaanissaat missiliorpaa.