Kalaallit Nunaat Kinamiut 23 millionit TV-kkut isiginnaassavaat

Isiginnaarutitigut aallakaatitassiaq nangeqattaartoq "Rediscovering the Arctic" CCTV2-kkut aallakaatinneqartussaasoq, Visit Greenlandip allaaseraa.

Kinamiut Nunatsinni angalanissaat Visit Greenlandip Air Greenland suleqatigalugu pilersaarusiorsimavaa, Nuummut Ilulissanullu aallaqqaammut angalassallutik, pilersaarutillu aamma iluatsissappata Qaanaamut angalasussaallutik.

TV-qarfik CCTV2 aningaasarsiornermik annerusumik sammisaqartuuvoq, Nunatsinnilu aningaasarsiornikkut periarfissat annerusumik aallakaatitassiami sammineqassallutik. Nunattali oqaluttuarisaanera aallaavigalugu Nunatsinni kulturi eqqartorneqassaaq, Nunatsinnilu Issittumilu nunani allani niuernikkut siunissami periarfissat aamma sammineqassallutik.

Kinap Issittoq ukiuni kingullerni soqutiginerulersimavaa, Issittumilu Siunnersuisoqatigiinni alaatsinaattutut maanna aamma inissisimalernikuulluni.

- Kalaallit Nunaat Kinamiunit tupinnartutut ullumi isigineqartarpoq, silap pissusiata allanngoriartornerata sunniuteqaatai pillugit oqallinnermi annerusumik tusagaqarfigisarlugu. Kalaallilli Nunaat ilisimaneqaleraluttuinnarpoq, tamannalu aallakaatitassiassatsinni takutikkusupparput, piorsarsimassutsikkut inissisimanera kalaallillu inooriaasiat Kinamiunut takutikkusullutigu, piviusulersaarummi ilitsersuisoq Xiaoguanh Liu oqarpoq.

Aallakaatitassiaq "Rediscovering the Arctic" arfineq-pingasunik immikkoortoqassaaq, aappaagulu 2015-imi aallakaatinneqassalluni. Inuit 23 millionit missaat CCTV2-mik isiginnaartartorineqakkajuttut aamma oqaatigineqarpoq.